Çudia: Ishte zhdukur 12 vjet më parë, plazhi rishfaqet brenda natës (Foto)

Një plazh në Irlandë, i cili u zhduk 12 vjet më parë, është rishfaqur brenda natës.

Rërat e Ashleam Bay, në ishullin Achill, u morën nga një stuhi në vitin 2005, duke lënë vetëm gurë dhe pishina shkëmbinjsh.

Por vendasit vunë re kthimin e papritur të plazhit pas një vere kur Uragani Brian goditi bregun irlandez.

Sean Molloy, menaxher i “Achill Island Tourism”, tha për Daily Mail se stuhitë e mëparshme kishin pastruar plazhin nga gurët, para se Brian të rikthente rërën.

“Ka folklor vendas që shkon pas në kohë me qindra vjet që thotë se ky plazh kthehet çdo shtatë vjet dhe pastaj zhduket”, thotë ai.

“Herën e fundit ai është parë në vitin 2005 dhe qëndroi për pak muaj, përpara se të zhdukej sërish”.

“Unë e kam vizituar plazhin. Ishte hera e parë që zbrisja në atë pjesë të bregut, megjithëse unë kam qenë këtu gjatë gjithë jetës time dhe nuk munda të kuptoj se sa i bukur ishte. Është absolutisht mahnitës, është një vend i preferuar për mua tani”.

Malcolm Cooney, një vendas që ka jetuar në Achill gjithë jetën e tij, tha se gjiri është “gjithmonë i ndryshëm”.

“Herën e fundit që rëra ishte në të zgjati vetëm një vit,” tha ai. “Para kësaj, kish ndodhur shumë shumë vite më parë”.

Ashleam Bay është vetëm gjashtë kilometra nga Dooagh, e cila pushtoi titujt në maj kur plazhi i saj u kthye pasi ishte zhdukur 33 vjet më parë. / Bota.al/