Coronavirusi, ambasadori shqiptar në Kinë thirrje të mos udhëtohet në këtë shtet

Ambasadori i Shqipërisë në Kinë, Selim Blertoja ka bërë thirrje që të shmangen udhëtimet për në Kinë.

Ai ka pohuar se situata në Kinë është e rrezikshme për shkak të virusit vdekjeprurës, transmeton Telegrafi.

“Këshilloj fort që, derisa situata të merret plotësisht nën kontroll, udhëtimet dhe kontaktet fizike me Kinën t’i shtyni për më vonë. Ju lutem informohuni sa më mirë e binduni vetë para se të hyni një situate më shumë rrezik nga virusi por edhe të papritur për shkak të kontrolleve te pazakonshme”, ka shkruar ai në Facebook.

Shkrimi i plotë:

“Të dashur miq e bashkëkombës kudo ku jeni. Siç e dini Kina po kalon një situate dramatike. Coronavirusi jo vetëm po merr jetë njerëzish por për shkak të potencialit të një rreziku në përmasa që mund të imagjinohen, po shtrëngon autoritetet të zbatojnë masa super të rrepta për frenimin e epidemisë, si mbyllje e transportit, superkontroll i lëvizjes se njerëzve, anulim i festimeve e grumbullimeve, si dhe disa shërbimeve publike në disa qytete, tashmë edhe përtej provincës Hubei dhe kryeqendrës Wuhan ku virusi shpërtheu dhe beteja është përqendruar. Nr faktik i vdekjeve nuk e shfaq mirë potencialin e rrezikut që është pranuar edhe nga OBSh dhe qe potencialisht mund të agravojë në ditët ne vijim. Autoritetet dhe mjekësia këtu po punojnë heroikisht. Këshilloj fort që, derisa situata te merret plotësisht nën kontroll, udhëtimet dhe kontaktet fizike me Kinën t’i shtyni për më vonë! Ju lutem informohuni sa më mirë e binduni vetë para se te hyni një situatë më shumë rrezik nga virusi por edhe të papritur për shkak të kontrolleve të pazakonshme”, ka shkruar ai./Telegrafi/