Vetëm disa orë pas hapjes së qasjes së hershme në beta-versionin e “Call of Duty: Black Ops 7”, video-loja është përmbytur nga mashtrues dhe hakerë, megjithëse Activision kishte premtuar mbrojtje të avancuar kundër mashtrimeve.
Kjo është video-loja e parë në seri që kërkon Secure Boot dhe TPM 2.0, por këto masa nuk mjaftuan për të ndalur mashtruesit.
Edhe pse këto kërkesa u prezantuan si të detyrueshme, përdorues në rrjetet sociale kanë ndarë video ku shihen mashtrues që përdorin “wallhack” dhe “aimbot”.
Problemet nuk ndalen këtu – disa lojtarë që fituan qasje të hershme përmes promovimeve, morën mesazhe gabimi që u kërkonin të bëjnë ende paraporositjen për të hyrë në beta.
Activision thotë se kjo është zgjidhur, por disa përdorues ende e hasin problemin.
Pas kritikave, Activision deklaroi se ka ndaluar (banuar) të gjithë mashtruesit që u shfaqën në video online.
Kjo vjen pak ditë pasi ata njoftuan përditësime të reja anti-mashtruesit që përdorin inteligjencë artificiale dhe mësim të makinerive për të analizuar miliona orë video-loje. /Telegrafi/
