BQE inflacioni do të rritet

Banka Qendrore Europiane (BQE) po fiton besim se inflacioni do të rritet përsëri te niveli objektiv, megjithatë duhet ende durim për të parë nëse rimëkëmbja ekonomike është e vazhdueshme, tha numri një i institucionit Mario Draghi.

Draghi e quajti luhatjen e kohëve të fundit të valutës së përbashkët si një burim paqartësie që kërkon monitorim, dhe tha se një lehtësim monetar në nivele të ulëta është ende i nevojshëm, për shkak se lëvizjet e shpejta mund të kthejnë mbrapsht punën e tyre.

“Në përgjithësi, ne po sigurohemi se inflacioni do të arrijë së shpejti nivelet objektiv, por dijmë gjithashtu se një masë e lehtësimit monetar është ende e nevojshme në mënyrë që drejtimi i inflacionit të materializohet”, tha Draghi në komisionin mbi çështjet ekonomike të Parlamentit Europian në Bruksel.

Ndërkohë që ekonomia e Eurozonës po rritet për të 17-in tremujor radhazi, BQE pritet të ngadalësojë programin e stimujve, duke nisur vitin që vjen, pavarësisht nivelit të çmimeve poshtë objektivit prej afër 2%.

Politikëbërësit në Bruksel thanë se debati tashmë do të fokusohet në detajet e ndryshimit monetar. Shumë prej tyre argumentojnë se qasja për përfundimin e stimujve duhet të jetë graduale, në mënyrë që fuqizimi i euros të mos shqetësojë. Draghi tha se luhatja e kohëve të fundit në kursin e këmbimit përfaqëson një burim të pasigurive që kërkon monitorim.

Draghi cilësoi gjithashtu efektivitetin e blerjes së obligacioneve të korporatave nga BQE, duke thënë se ka ulur kostot e huamarrjes, gjë që ka ndihmuar bizneset e vogla e të mesme për të patur akses në financim të lirë.

Nisur 2 vite e gjysmë më parë, programi i blerjes prej 2.3 trilionë euro i bankës, ka ulur kostot e huamarrjes dhe ka nxitur shpenzimet e rritjen ekonomike të Eurozonës, duke krijuar rreth 7 milionë vende pune që prej ditëve më të këqija të krizës së borxhit.

Inflacioni nga ana tjetër, ka qenë i ngadaltë në reagim, duke e lënë institucionin në dilemë. Mbajtja e rritjes së çmimeve në afër 2% është mandati i vetëm i BQE. /Telegrafi/