“Bolero në vilën e pleqve”

Kanë përfunduar xhirimet e filmit “Bolero në vilën e pleqve”, skenari i të cilit është me motivet e veprës së Fatos Kongolit.

Regjinë e këtij filmi e ka bërë Spartak Pecani, i cili për realizimin e skenarit ka bashkëpunuar edhe me Linda Fejzajn. Produksionin e filmit po e bën “Eclipss”, me mbështetjen financiare të Qendrës Kombëtare të Kinematografisë në Shqipëri dhe me koproduksionin e Qendrës Kinematografike të Kosovës.

Në qendër të filmit janë një çift pleqsh, të cilët janë të detyruar të jetojnë të vetëm në fundjetën e tyre edhe pse kanë tre fëmijë.

Biri i tyre ua siguron një punëtore shtëpie, në dukje një vajzë e qetë dhe e përkushtuar, por vajza e pleqve duket se nuk e pëlqen aspak mysafiren e re në shtëpinë e prindërve. Kjo do të bëjë që ajo të zhbirojë jetën e saj, nga ku mëson se me kë ka të bëjë. Punëtorja që jeton në vilë ka një të kaluar të errët për mendimin e vajzës së pleqve, për më tepër edhe prirjet e saj janë në kundërshti me parimet dhe me principet që ka. Në këtë film luajnë aktorët: Robert Ndrenika, Margarita Xhepa, Gentiana Ramadani, Olta Daku, Olta Gixhari, Ledjon Zoi e Afrim Muçaj. /Zëri/