Blinken: SHBA-ja nuk e ka parë Rusinë të ndërmarrë hapa që sugjerojnë se do të përdorë armë bërthamore në luftën e Ukrainës

Sekretari amerikan i Shtetit, Antony Blinken, deklaroi të premten se Shtetet e Bashkuara nuk e kanë parë Rusinë të ndërmarrë hapa që sugjerojnë se do të përdorte armë bërthamore në luftën kundër Ukrainës, por përsëriti se SHBA-ja e merr “shumë seriozisht” kërcënimin bërthamor të presidentit rus Vladimir Putin, transmeton Telegrafi.

“Ne po shikojmë me shumë kujdes për të parë nëse Rusia në të vërtetë po bën diçka që sugjeron se ata po mendojnë përdorimin e armëve bërthamore. Deri më sot, ne nuk i kemi parë ata të ndërmarrin këto veprime”, tha Blinken në një konferencë shtypi në Departamentin e Shtetit të SHBA-së.

“Por ne gjithashtu e dimë se Rusia është e përfshirë në brutalizimin e tmerrshëm të Ukrainës, dhe kështu kërcënimet që ata bëjnë, ne i marrim shumë seriozisht”, vazhdoi ai.

“Për sa i përket qëllimit të presidentit Putin, nuk do të spekuloj për atë që ka në mendjen e tij, mund t’ju them vetëm se ne planifikojmë kundër çdo skenari të mundshëm, përfshirë edhe këtë”, tha Blinken. /Telegrafi/