Blinken dhe Macron i kërkojnë Azerbajxhanit të ndalojë menjëherë ofensivën në Nagorno-Karabakh

Kreu i diplomacisë amerikane Antony Blinken i ka bërë thirrje Bakusë që të “përfundojë menjëherë” ofensivën e saj në rajonin e diskutueshëm të Nagorno-Karabakhut, siç bëri edhe presidenti francez Emmanuel Macron.

“Këto veprime përkeqësojnë situatën tashmë të tmerrshme humanitare në Nagorno-Karabakh dhe minojnë perspektivat për paqe”, tha Blinken në një deklaratë, duke theksuar se “përdorimi i forcës është i papranueshëm” dhe duke bërë thirrje për “ndërprerje të armiqësive”, transmeton Telegrafi.

Emmanuel Macron “dënoi në termat më të ashpër përdorimin e forcës nga Azerbajxhani” në Nagorno-Karabakh, dhe i bëri thirrje Bakusë që “të ndalojë menjëherë ofensivën”, tha presidenca franceze në një deklaratë për shtyp.

Lexo po ashtu Pse Azerbajxhani dhe Armenia janë në luftë?

Gjatë bisedimeve me kryeministrin armen, Nikol Pashinyan, kreu i shtetit francez bëri thirrje gjithashtu për “vazhdimin e menjëhershëm të bisedimeve për të gjetur një zgjidhje për krizën humanitare në Nagorno-Karabakh, për të arritur një paqe të drejtë dhe të qëndrueshme midis Armenisë dhe Azerbajxhanit, dhe garantojnë të drejtat dhe sigurinë e popullit të Nagorno-Karabakh, në përputhje me detyrimet e marra dhe ligjin ndërkombëtar”.

Më herët sot, Franca kërkoi një takim urgjent të Këshillit të Sigurimit të Kombeve të Bashkuara. Azerbajxhani nisi një operacion ushtarak në Nagorno-Karabakh të martën, tre vjet pas luftës së mëparshme, duke kërkuar dorëzimin e kundërshtarit të tij armen në rajon, për të cilin ka qenë në mosmarrëveshje me Armeninë për dekada. /Telegrafi/