Lumezi përfundon mandatin, Besim Kelmendi caktohet ushtrues detyre i Kryeprokurorit të Shtetit

Këshilli Prokurorial i Kosovës ka caktuar Besim Kelmendin si ushtrues detyre të Kryeprokurorit të Shtetit.

Në mbledhjen e sotme të KPK-së është vendosur që Kelmendi ta ushtrojë këtë detyrë deri në një vendim të ri të këtij institucioni.

Caktimi i ushtruesit të detyrës erdhi pasi që sot ka përfunduar mandati kryeprokurorit aktual të shtetit, Aleksandër Lumezi.

Lumezi e përfundoi sot mandatin në pozitën e Kryeprokurorit të Shtetit, pozitë të cilën e kishte marrë më 21 prill 2015.

Lexo po ashtu Përzgjedhja e kryeprokurorit të shtetit kundërshtohet nga ambasadorët e huaj dhe organizatat vendore - KPK thotë se procesi ishte legjitim

Ndërkaq, sipas Rregullores Nr. 06/2019 për emërimin e Kryeprokurorit të Shtetit dhe kryeprokurorëve të prokurorive të Republikës së Kosovës, në qoftë se mandati i Kryeprokurorit të prokurorisë përkatëse ka përfunduar në çfarëdo mënyre, KPK-ja merr vendim për caktimin e ushtruesit të detyrës.

Ndryshe, më 6 prill, Këshilli Prokurorial i Kosovës (KPK) ka votuar unanimisht Blerim Isufajn për këtë pozitë, kurse vendimi për dekretim tani mbetet në duart e presidentes Vjosa Osmani.

Votimi i tij në krye të prokurorisë është kundërshtuar nga ambasadorët e huaj në Kosovë e organizata vendore, pasi sipas tyre janë shpërfillur parimet për një proces të drejtë dhe meritor./Telegrafi/