Besian Mustafa i reagon Memli Krasniqit: Kërko përgjegjësi tek ideatori i vërtetë i shpërndarjes së Kuvendit

Zëdhënësi i Lidhjes Demokratike të Kosovës, Besian Mustafa, i ka reaguar kryetarit të PDK-së, Memli Krasniqi, i cili gjatë konferencës për media akuzoi partitë e tjera opozitare për mos shpërndarjen e Kuvendit.

Deputeti i LDK-së, Besian Mustafa, ka thënë për Telegrafin se Memli Krasniqi duhet të kërkojë llogari nga ai të cilit i shkoi në darkë.

“Krasniqi ka bërë marrëveshje me Kurtin, jo me LDK-në, prandaj i pakuptimtë roli i i tij si ndërmjetësues. Le të kërkojë përgjegjësi tek ideatori i vërtetë i shpërndarjes dhe tek marrëveshja që ka bërë me të”, ka thënë Mustafa.

Lexo po ashtu Krasniqi: Mundësia për shpërndarjen e Kuvendit është shteruar, i habitur që partitë tjera opozitare s'patën gatishmëri

Mustafa ka ripërsëritur qëndrimin e LDK-së, që kryeministri duhet të dorëhiqet dhe pastaj vendi të shkojë në zgjedhje.

“LDK nuk bën marrëveshje me Kurtin. Qëndrimi ynë ka qenë i qartë dhe i zëshëm edhe para dakordimit tashmë të dështuar të tyre. Dorëheqje, më pas zgjedhje!”, ka thënë Mustafa.

Ndryshe, kryetari i PDK-së, Memli Krasniqi në një konferencë për media ka bërë të ditur se është ezauruar mundësia e shpërndarjes së Kuvendit.

Krasniqi tha se propozimi i PDK-së për shpërndarjen e Kuvendit nuk ka marrë mbështetjen e duhur.

“Sot më 29 maj ashtu siç e kam cekur si afat në letrën që u kam dërguar tre liderëve politik, duke ndjerë keqardhje ju njoftoj se mundësia për shpërndarjen e Kuvendit tashmë është ezauruar. Thirrja e PDK-së për koordinim mes partive më të mëdha politike në vend që të shpërndajmë Kuvendin nuk ka gjetur mbështetjen e mjaftueshme. Jam i habitur nga mosgatishmëria e partive opozitare për të mos ta bërë një gjë të tillë”, tha Krasniqi.

Ai shtoi se PDK javëve të fundit ka pasur një angazhim të shtuar për ta dërguar vendin në zgjedhje të parakohshme përmes shpërndarjes së Kuvendit me qëllim të vetëm për t’ia shkurtuar mandatin kësaj qeverie. /Telegrafi/