Befason Chelsea, fut në listën e dëshirave sulmuesin e njohur të Ligës Premier

Chelsea po eksploron mundësinë e transferimit të sulmuesit të Evertonit, Dominic Calvert-Lewin, sipas një raportimi të fundit.

“Blutë e Londrës” kanë qenë në gjueti për një sulmues të ri dhe pritshmëritë ishin që do të dhuronin një shumë të majme parash për transferimin e Victor Osimhen, megjithatë duket se Chelsea kanë zbehur interesimin e tyre për reprezentuesin nigerian i cili ka një klauzolë lirimi në vlerë prej 100 milionë eurosh.

Një opsion më i lirë është futur tani në listën e tyre të dëshirave. Benjamin Sesko po shihet si një kandidat serioz, ndërsa pati raportime së fundmi se edhe Julian Alvarez mund të jetë një opsion i mundshëm.

Calvert-Lewin po futet në vitin e tij të fundit të kontratës tek Evertoni dhe i është ofruar mundësia për ta rinovuar kontratën, megjithëse problemet financiare të klubet anglez mund t’i detyrojnë ata që ta shesin yllin e tyre këtë verë.

Kjo ka bërë që Chelsea të futet në garë për shërbimet e tij aty ku besohet se janë edhe disa klube të tjera të Ligës Premier.

2023/2024 ishte një sezon i rëndësishëm për Calvert-Lewin i cili arriti të bëjë 32 paraqitje për Evertonin duke i dhënë fund dy sezoneve të njëpasnjëshme plot me lëndime.

27-vjeçari kishte shënuar 13 gola në sezonin 2019/20 dhe 16 të tjerë në sezonin vijues, para se një seri lëndimesh ta vendos të ardhmen e tij tek Evertoni në dyshim.

Sa i përket sezonit që lamë pas, Calvert-Lewin e ka gjetur rrugën e rrjetës në shtatë raste, ndërsa vetëm tre lojtarë të Chelseat (Cole Palmer, Nicolas Jackson dhe Raheem Sterling) kanë bërë më mirë se ai.