Bebe Rexha po vjen në Shqipëri për të ndihmuar të prekurit nga tërmetet

Këngëtarja shqiptare me famë botërore, Bebe Rexha, po vjen në Shqipëri!

Ajo do ta vizitojë vendin e saj për të mbështetur të prekurit nga dy tërmetet e fundit që goditën Shqipërinë, duke shkaktuar viktima të mëdha në njerëz dhe dëme të shumta materiale.

Këto ditë artistja madje ka hapur edhe një fond online, ku secili mund të dhurojë për të kontribuuar për të prekurit nga tërmetet.

Bëhet me dije se deri më tani janë grumbulluar rreth 10 mijë dollarë, gjersa caku për të arritur është gjithsej 50 mijë.

Lexo po ashtu Nuk mungon edhe reagimi i Bebe Rexhës, me një video artistja thotë në shqip "ju dua", ndërsa premton mbledhjen e fondeve për të prekurit nga tërmetet

30-vjeçarja konfirmoi ardhjen e saj në Shqipëri përmes një video të publikuar në rrjetin social Instagram, ku me ç’rast edhe bën thirrje që këto ditë më shumë se kurrë t’i bashkohemi solidarizimit me Shqipërinë.

“Hej çkemi, unë jam Bebe dhe jam këtu në turneun e Jonas Brother, dhe mora lajmin e tmerrshëm se ka pasur një tërmet në Shqipëri dhe ju të gjithë e dini se familja ime është shqiptare, kështu që kam vendosur të bëj një llogari të GoFundMe që do t’i ndihmojë të gjithë ata në nevojë dhe unë personalisht do të largohem nga turneu, do marr dy ditë pushim dhe do të shkoj në Shqipëri dhe personalisht do t’u jap njerëzve ushqim, ujë, të ju ndihmoj në ndërtimin e shtëpive të reja. Të sigurohem se çdo monedhë do të shkojë në vendin e duhur. Çdo dollar do të ndihmonte. Edhe nëse ju vetëm do ta ndani linkën e llogarisë së GoFundMe. Linku është më lart. Do ju mbaj të informuar. Faleminderit shumë për mbështetjen”, thotë përgjatë videos këngëtarja me prejardhje nga Dibra.

https://www.instagram.com/p/B5Yi54pl2DG/

Se do të jetë prezente në ditët në vijim për të ndihmuar vendin e saj, ajo e bëri të ditur edhe në përshkrimin e videos së ndarë me 9.9 milionë ndjekësit e saj në rrjetin social Instagram

“Ju lutem ndihmoni Shqipërinë. Unë personalisht do të fluturoj për në Shqipëri për t’u siguruar që paratë janë vënë në përdorim të mirë. Lidhja për fondin është në biografinë në faqen e Instagramit”, ka shkruar Bebe Rexha në mbishkrimin e videos.

Kujtojmë që hera e fundit kur artistja me nam botëror ishte në Shqipëri, ishte vera e vitit 2017, ku erdhi bashkë me familjen e saj për pushime në jug të Shqipërisë. /Telegrafi/