Banorët e Resnjës ditët e verës i kalojnë pa ujë për pije

Banorët e Resnjës natën e kalojnë të zgjuar duke pritur që të vijë uji, ose udhëtojnë me kilometra që të arrijnë deri tek ai. Një fat i këtillë i përcjell mbi një mijë banorë të zonave të larta në Resnjë dhe një pjesë të fshatit Izbishte.

Edhepse kanë ujësjellës, në shtëpitë e tyre mungon uji i pastër për pije. Ata ankohen se kjo është e padurueshme, pasi nuk mund ta mbajnë pastërtinë dhe frikësohen nga sëmundje ngjitëse, përcjell Telegrafi Maqedoni.

Banorët për Telma thonë se, problemi me ujësjellësin po zgjatë me vite edhe gjatë stinës së dimrit edhe të verës. Ata për çdo ditë kërkojnë nga pushteti lokal në Resnjë që të gjejë zgjidhje, por prej atje marrin vetëm premtime.

Drejtori i ndërmarrjes komunale në Resnjë “Proleter”, Ljupço Kërstevski, pohoi se një pjesë e Resnjës dhe disa fshatra përreth kanë probleme me ujin, por tha se një gjë e tillë ndodhë vetëm disa orë në ditë.

Për mungesën e ujit ai akuzoi qytetarët e pandërgjegjshëm, për të cilët paralajmëroi edhe dënime./Telegrafi/