Mbrëmë, në sallën e mbushur të AMC-së, Baleti Kombëtar i Kosovës solli premierën madhështore të shfaqjes “Bolero & Bach La Oriental”, me koreografi nga mjeshtri i njohur Mehmet Balkan.
Kjo vepër, e cila shënon premierën e katërt për vitin 2025, u prit me duartrokitje të gjata dhe entuziazëm të jashtëzakonshëm nga publiku, që u mahnit nga interpretimi i balerinëve dhe fuqia emocionale e performancës.
Në këtë krijim artistik, muzika e famshme e Maurice Ravel dhe Johann Sebastian Bach ndërthuren mjeshtërisht me elemente orientale, duke sjellë një ekuilibër mes klasikës dhe modernitetit, të përkthyer përmes lëvizjes elegante dhe ekspresive të trupit të baletit.
Shfaqja dëshmoi edhe njëherë nivelin e lartë profesional dhe kreativitetin e trupës së Baletit Kombëtar të Kosovës, që po vazhdon të ngjitet me hapa të sigurt në skenën ndërkombëtare të artit skenik.
Në fund, audienca shpërtheu në ovacione dhe duartrokitje të pandërprera, duke përshëndetur balerinët për interpretimin e tyre brilant dhe mjeshtrin Mehmet Balkan për koreografinë e frymëzuar.
Baleti Kombëtar i Kosovës u shpreh se ky është vetëm fillimi i një sezoni të pasur artistik dhe se publikun e pret një kalendar plot emocione e surpriza në shfaqjet e ardhshme.
“Shihemi në shfaqjet e ardhshme!”, u tha në fund nga ekipi artistik i baletit, duke lënë pas një mbrëmje të paharrueshme për artdashësit kosovarë. /Telegrafi/
