Autorja e esesë “Si ta vrasësh burrin tënd”, dënohet me burgim të përjetshëm për vrasjen e bashkëshortit të saj

Nancy Crampton-Brophy, autore e esesë “Si ta vrasësh burrin tënd”, u dënua me burgim të përjetshëm të hënën në Oregon për vrasjen e bashkëshortit të saj.

Sipas CNN, përcjell Telegrafi, Crampton-Brophy, 71-vjeçare, u dënua në maj për vrasje të shkallës së dytë për vdekjen e bashkëshortit të saj, kuzhinierit Daniel Brophy në qershor 2018, i cili u qëllua për vdekje në shkollën e kuzhinës ku jepte kurse gatimi.

Në dokumentet e gjykatës, prokurorët thanë se 63-vjeçari ishte qëlluar dy herë – një herë në shpinë teksa qëndronte pranë lavamanit duke mbushur kova me akull dhe ujë për nxënësit, dhe më pas në gjoks nga afër.

Çifti kishte borxhe – romanet e vetë-botuar të Crampton-Brophy nuk po shiteshin – dhe ai kishte sigurime për më shumë se 1 milion dollarë, argumentuan prokurorët.

Crampton-Brophy dëshmoi se ajo ishte më mirë financiarisht me burrin e saj gjallë – dhe fakti që minibusi i saj u pa pranë shkollës ishte thjesht rastësi.

Prokurorët thanë në gjykatë se autorja e ndoqi burrin e saj në punë dhe e qëlloi atë me një pistoletë Glock.

Hetuesit gjetën në vendngjarje dy gëzhoja 9 mm. Ajo kishte blerë gjithashtu një çantë montimi “armë fantazmë” që hetuesit e gjetën më vonë në një objekt magazinimi. “Armët fantazmë” janë armë zjarri të paregjistruara dhe të pagjurmueshme.

Crampton-Brophy bleu një armë dhe një çantë armësh fantazmë si pjesë e kërkimit për një libër të ri, tha ajo para jurisë.

“Ajo që mund t’ju them është se ishte për të shkruar”, tha ajo. “Nuk ishte, siç do ta besoni, për ta vrarë burrin tim”. Lajmet për vrasjen dhe akuzat penale që rezultuan u bënë tituj kudo — pjesërisht për shkak të një eseje të shkruar nga Crampton-Brophy shtatë vjet para vdekjes së burrit të saj.

Në vitin 2011, ajo e publikoi esenë në një postim famëkeq në blog të titulluar, “Si ta vrasësh burrin tënd”. /Telegrafi/