Arrestohen dy persona për prerje ilegale të pyllit në Suharekë, u sekuestrohen drutë

Dy persona janë arrestuar këtë të enjte në Suharekë, pasi dyshohen për prerje ilegale të pyllit.

Policia njofton se ka arritur t’i sigurojë disa fotografi ku personat e dyshuar shihen me traktor duke bartur dru ilegalisht. Dyshohet se këto dru janë prerë në vendin e quajtur “Kodra e Hanës” në bjeshkën e Bukoshit, Suharekë.

“Me datë 13.07.2023 Sektori i Hetimeve ka arrestuar dy të dyshuar në fshatin Maqitevë, të cilët me urdhër të prokurorit janë intervistuar, është hapur rast ‘Vjedhje e Pyllit’, ndërsa dy te dyshuarit B.A. dhe I. A. me urdhër të prokurorit pas intervistimit janë liruar”, thuhet në komunikatën për media.

Gjatë arrestimit të personave të dyshuar, hetuesit policorë thuhet se kanë vërejtur një traktor i cili ka pasur një ngarkesë me dru, nga poseduesi i këtyre druve janë kërkuar dokumentet përkatëse të tij, por i dyshuari nuk i posedonte.

“Janë njoftuar autoritetet pyjore të KK Suharekë të cilët e kanë bërë konfiskimin e druve. Vlen të ceket se u dyshuari B.A. ka pasur edhe dy urdhëresa aktive nga Gjykata për të cilat është njoftuar ekipi i Sektorit Policor Stacioni Suharekë të cilët janë marrë me rastin”, bëhet e ditur tutje./Telegrafi/