Anulohet “auto-show” në Gjenevë

Ekspozita Ndërkombëtare e Veturave në Gjenevë, që është planifikuar të mbahet në shkurt të vitit të ardhshëm, është anuluar për të katërtin vit radhazi, bënë të ditur organizatorët e ngjarjes.

Ata thanë se në vend të saj tani do të fokusohen tek një ekspozitë tjetër plotësuese, Ekspozita Ndërkombëtare e Veturave e Gjenevës në Katar, e cila do të mbahet më vonë gjatë vitit 2023 në kryeqytetin Doha.

“Për shkak të paqartësive në ekonominë dhe gjeopolitikat globale, si dhe të rrezikut në lidhje me zhvillimet e pandemisë, organizatorët kanë vendosur që ekskluzivisht të fokusohen në organizimin e ngjarjes në Doha në vitin 2023”, thanë organizatorët dhe komiteti permanent i Ekspozitës Ndërkombëtare të Veturave në Gjenevë (ENVGJ), në një deklaratë të lëshuar nga ana e tyre, raporton Reuters, transmeton Telegrafi.

Ekspozita e veturave në Doha të Katarit, e cila fillimisht u planifikua si ekspozitë plotësuese e ngjarjes në Gjenevë, tani do të mbetet ekspozita e vetme e ENVGJ për vitin 2023.

Organizatorët bëjnë të ditur se kjo ekspozitë është planifikuar që të mbahet çdo dy vjet.

Ekspozita e veturave në Gjenevë zakonisht është një ngjarje vjetore, por që është anuluar përgjatë tre viteve të fundit për shkak të situatës me pandeminë. /Telegrafi/