Anëtarësimi në BE dhe NATO, Szunyog: Ndalja e progresit në dialog është mbyllje e derës

Ambasador i Bashkimit Evrpian (BE) në Kosovë, Tomas Szunyog, ka deklaruar të hënën se e vetmja rrugë drejt anëtarësimit të Kosovës në institucionet Euro-Atlantike është dialogu. Ai ka thënë se mungesa e progresit është mbyllje e derës.

Këto komente ambasadori Szunyog i bëri në panelin me temë “Hartimi i së ardhmes: Drejtimet e Politikave dhe Angazhimi Diplomatik”, ku mori pjesë ambasadori i ShBA-së, në Kosovë, Jefrrey Hovenier dhe Ministrja e Punëve të Jashtme dhe Diasporës (MPJD), Donika Gërvalla.

Szunyog tha se në qendër të interesit të Këshillit të Evropës po qëndron Evropa Lindore dhe aktualisht jo Ballkani Perëndimor.

Lexo po ashtu ​Anëtarësimi i Kosovës në NATO, Hovenier: Na ndihmoni që t’ju ndihmojmë

“Mënyra e vetme për të hyrë në procesin Evropian dhe Euro-Atlantik është progresi përmes dialogut. Progresi hap dyert, mungesa e progresit i mbyllë ato”, theksoi Szunyog.

Ministrja e Punëve të Jashtme dhe Diasporës (MPJD), Donika Gërvalla shprehet optimiste se deri në vitin 2030, Republika e Kosovës do të jetë pjesë e Aleancës Veriatlantike të NATO-s dhe në Bashkimin Evropian. Por, menjëherë ndaj kësaj deklarate ka reaguar ambasadori i ShBA-së, në Kosovë, Jefrrey Hovenier, ku u shpreh se anëtarësimi i Kosovës në Bashkimin Evropian në vitin 2030 është ambicioz, kurse për anëtarësimin në NATO, theksoi se Kosova duhet ta ndihmojë ShBA-në, në mënyrë që edhe ajo ta ndihmojë Kosovën.