Ambasadorët e QUINT-it takojnë OJQ-të serbe për të cilat Bislimi i reagoi Lajçakut

Pasi zëvendëskryeministri Besnik Bislimi shprehu një sërë kritikash ndaj takimit të të dërguarit të posaçëm të BE-së për dialogun ndërmjet Kosovës dhe Serbisë, Miroslav Lajçak, me një grup të komunitetit serb nga shoqëria civile, mediat dhe zyra e Avokatit të Popullit –këta të fundit janë pritur në takim edhe nga ambasadorët e shteteve të QUINT-it në Kosovë.

Pamje nga takimi ka publikuar Ambasadori i Gjermanisë në Kosovë, Jorn Rohde, i cili i ka quajtur “partnerë të besueshëm”.

Lexo po ashtu Bislimi kritikon ashpër Lajçakun për qasje jo-neutrale në dialogun Kosovë-Serbi

“Ambasadorët e QUINT-it [SHBA-ja, Britania e Madhe, Gjermania, Franca, Italia] dhe BE-së vlerësojnë mundësinë për t’u takuar sot me zëvendësin e Avokatit të Popullit dhe përfaqësuesit e komunitetit serb të Kosovës – të cilët janë partnerë të besueshëm në përpjekjet tona të përbashkëta për përmirësimin e të drejtave të njeriut dhe marrëdhënieve ndëretnike për Kosovën”, ka shkruar Rohde në rrjetin social “X”.

Quint and EU Ambassadors appreciated the opportunity to meet today with the Deputy Ombudsperson and representatives of the Kosovo Serb community – all of whom are trusted partners in our shared efforts to advance human rights and interethnic relations in Kosovo. pic.twitter.com/HtPfD9KBxx

— Ambassador Jörn Rohde (@GermanAmbKOS) February 16, 2024

Ky grup i serbëve, duke përfshirë zëvendësin e Avokatit të Popullit në Kosovë, Sërgjan Sentiq, Jovana Radosavljeviq dhe Miodrag Miliçeviq nga organizatat joqeveritare Iniciativa e Re Sociale dhe Aktiv, drejtorin e RTV-së lokale, Kim Isak Vorguçiq dhe Dragisha Mijaciqin nga grupi punues i Beogradit i Konventës Kombëtare për Bashkimin Evropian, u takuan me Lajçakun më 13 shkurt në Bruksel.

“Gjithmonë ndihmon kur dëgjohen zëra nga terreni”, ka shkruar Lajçak në një postim në rrjetin social X pas atij takimi.

Kësaj, zëvendëskryeministri i Kosovës u përgjigj duke njoftuar se në takimin me Lajçakun ishte një “delegacion i përbërë kryesisht nga organizata joqeveritare serbe nga Kosova, të cilat në mënyrë aktive dhe hapur avokojnë kundër integrimit të qytetarëve serbë në sektorin ekonomik dhe në jetën sociale të Kosovës”. /Telegrafi/