Al Trade Center vazhdon traditën e mbjelljes së pemëve në Drenas, Fushë Kosovë dhe Prishtinë

Kompania gjigante Al Trade Center ka vazhduar traditën edhe sot me datën 1 qershor për nder të Ditës Botërore të Fëmijëve që të mbjellë pemë në tri komuna të Kosovës – Drenas, Fushë Kosovë dhe Prishtinë.

Në bashkëpunim me komunat përkatëse, lulet janë mbjellë edhe në praninë e fëmijëve me qëllim që ata të vetëdijesohen në moshën sa më të hershme për benefitet që i ka ruajtja e natyrës, gjelbërimi, etj.

Arben Shala, nënkryetar i komunës së Drenasit, në një intervistë për Telegrafin është shprehur tejet falënderues ndaj kompanisë Al Trade Center për dhurimin e fidanëve të cilat janë mbjellë afër sheshit kryesor të qytetit.

Njësoj është deklaruar edhe Fadil Krasniqi, nënkryetar i komunës së Fushë Kosovës, i cili fëmijëve të pranishëm u ka uruar rritje të shëndetshme e me sukses dhe i cili po ashtu ka falënderuar kompaninë Al Trade Center duke e përgëzuar për përkushtimin e vazhdueshëm në organizimin e aktiviteteve që janë në të mirën e qytetarëve.

Ndërkaq në kryeqytet, 40 fidane janë mbjellë në Parkun e Velanisë, ku e pranishme ka qenë drejtoresha e Drejtorisë së Parqeve, Fatime Hajdari.