(E plotësuar) Sonte rreth orës 19:00 në rrugën nacionale Prishtinë-Pejë, në Komoran, ka ndodhur një aksident komunikacioni, në të cilin gjashtë persona janë lënduar

Policia ka konfirmuar se në aksidentin e sotëm janë përfshirë tri automjete.

Zëdhënësi i Policisë së Kosovës, Daut Hoxha, i ka thënë Telegrafit se sipas informacioneve nga vendi i ngjarjes gjashtë persona kanë marrë lëndime dhe janë dërguar për trajtim mjekësor.

“Njësitet policore dhe ato kompetente për menaxhim të trafikut në autostradë po ndërmarrin veprimet e nevojshme për hetimin e shkaqeve të këtij aksidenti dhe po kryejnë procedurat e nevojshme në vendin e aksidentit”, ka thënë Hoxha, për Telegrafin.

“Duke iu referuar ndryshimeve atmosferike te reshurave të shiut dhe zvogëlimit të dukshmërisë që mund të paraqiten nëpër rrugët tona, kryesisht gjatë orëve të mbrëmjes, natën dhe orëve të hershme të mëngjesit, kërkojmë nga të gjithë pjesëmarrësit në trafik në veçanti drejtuesit e automjeteve të respektojnë rregullat e trafikut, sidomos ato mbi përcaktimin e shpejtësisë dhe vozitjen t’ia përshtatin kushteve të rrugës”, tha Hoxha.

Ai tha se Policia e Kosovës me njësitet e saj po ndërmerr dhe do të ndërmerr masa të nevojshme ligjore për të gjithë ata drejtues që bien ndesh me rregullat në komunikacion, duke përfshirë edhe mos posedimin e pajisjeve të nevojshme për sezonin dimëror. /Telegrafi/