Aeroplani ushtarak përplaset në një ndërtesë banimi në Sudan, të paktën 20 të vdekur

Një aeroplan ushtarak sudanez ra të martën në një zonë banimi pranë aeroportit ushtarak “Wadi Seidna” në veri të Omdurmanit, duke lënë të vdekur më shumë se 20 persona, përfshirë ushtarë dhe civilë.

Në një deklaratë të lëshuar, ushtria sudaneze, e cila është në luftë me Forcat Paramilitare të Shpejta të Mbështetjes (RSF) që nga prilli i vitit 2023, tha se aeroplani ra gjatë ngritjes nga një bazë ajrore.

“Personat e plagosur janë dërguar në spital, dhe ekipet e zjarrfikësve arritën të shuajnë flakët në vendin e aksidentit”, shtoi deklarata. Një burim ushtarak kishte thënë më parë për AFP se një defekt teknik ishte shkaku i rrëzimit të aeroplanit Antonov.

Aksidenti ndodhi pranë bazës ajrore Wadi Seidna – një nga qendrat më të mëdha ushtarake të ushtrisë në Omdurman, pjesë e Khartumit të Madh.

🔥 A military plane crashed into a residential building in Sudan

A Sudanese airplane crashed into a residential area near Wadi Seidna military airport in northern Omdurman on Tuesday, killing more than 20 people, including soldiers and civilians, military and medical sources… pic.twitter.com/kWVSjJuId9

— NEXTA (@nexta_tv) February 26, 2025

Ky incident ndodhi një ditë pasi Forcat Paramilitare të Shpejta të Mbështetjes (RSF) morën përsipër përgjegjësinë për rrëzimin e një aeroplani luftarak në Nyala, kryeqytetin e Darfurit të Jugut.

Përshkallëzimi i fundit vjen pas një përparimi të rëndësishëm të ushtrisë në Sudanin e Mesëm dhe kryeqytetin Khartum në ofensivën me shumë fronte kundër RSF.

Që nga prilli i vitit 2023, kreu i ushtrisë Abdel Fattah al-Burhan dhe zëvendësi i tij i mëparshëm dhe komandanti i RSF, Mohamed Hamadan Daglo, dikur aleatë, janë përfshirë në një luftë të egër pushteti.

Konflikti, i cili ka marrë jetën e dhjetëra mijëra njerëzve, shpërtheu pas një përçarjeje mes Burhan dhe Daglo për strukturën e ardhshme të qeverisë. /Telegrafi/