Abdixhiku: Gjakova meriton më mirë

Kandidati për kryeministër nga Lidhja Demokratike e Kosovës, Lumir Abdixhiku në një tubim sonte me qytetarët në Gjakovë, tha se me LDK-në në pushtet të gjitha kategoritë do të trajtohen siç e meritojnë. Ai tha se është koha që vendi të zhvillohet dhe se mision i LDK-së është krijimi i kushteve më të mira të punës.

Ndërsa, përmendi projekte të mëdha infrastrukturore dhe zhvillimore, Abdixhiku premtoi se rruga Dollc-Gjakovë do të përfundojë në javët e para të qeverisë së re.

“Si bartës të së djathtës, si bartës politik të lëvizjes për liri, demokraci e pavarësi, neve LDK-së dhe partnerit tonë PSHDK na takon të bëjmë rrugën e konsolidimit e rrugën e integrimit euroatlantik destinacionin tonë përfundimtar. Me fjalë të atit themeltar të shtetit të Kosovës, presidentit historik dr. Ibrahim Rugova, Kosova shtet i pavarur e sovran, i anëtarësuar në NATO e BE me miqësi të përhershme me SHBA-të ishte misioni ynë, dhe do të jetë misioni jonë nesër…Republika jonë qëndron në udhëkryqin më të madh politik e ekzistencial që nga themelimi i saj si shtet i pavarur e sovran. Në këtë definim të së ardhmes sonë qytetarët e Kosovës duhet të kuptoni peshën e zgjedhjes tuaj. Si një shtet me njerëz që bëjnë jetën këtu, shtet në zhvillim apo si një vend i zymte i propagandës, i përçarjeve, i mbylljes e sanksioneve, si një vend i zmbrapsjes së dhimbshme, i thyerjes së madhe përtej së cilës mbesin dhe pak, e keq. Këto zgjedhje ju qytetarë duhet të keni të qartë. Me 9 shkurt është koha të ktheni tek LDK njëherë e përfundimisht”, tha Abdixhiku.

Derisa për qytetarët e Gjakovës premtoi projekte të mëdha infrastrukturore përfshirë edhe kompletimin e stadiumit.

“Ashtu siç është historiku kulturor Gjakova jonë, ashtu do të trajtojmë Çarshinë e madhe e të bukur të qytetit tuaj, është pasuri kombëtare, do të keni mbështetjen e LDK. Po ashtu qeveria jonë parasheh që rrugën nga Kosharja në bjeshkë të Babaj Bokës deri në Bjeshkë të Brovinës të përfundohet me mbështetje të qeverisë qendrore. Rruga Dollc-Gjakovë do të përfundojë sa më parë e shpejt, do të jem në terren personalisht që në javët e para të qeverisë së re të shoh si po shkojnë punimet. Gjakova meriton shumë më mirë dhe stadiumin e Gjakovës do të keni të plotë. Për gjithë të rinjtë, kemi programin kombëtar për trajnime në teknologji”, tha Abdixhiku, transmeton KP.

I pari i LDK-së tha se me këtë parti në qeverisje do të ndalohet braktisja e vendit nga të rinjtë.

Ai  tha se me LDK-në do të merr fund koha e pakënaqësive që kanë shfaqur policet e ushtarët dhe të gjitha kategoritë e tjera.

Kujtojmë, zgjedhjet e përgjithshme mbahen më 9 shkurt, derisa fushata zgjedhore ka filluar me 11 janar