600 maturantë aplikuan në Universitetin “Kadri Zeka” në Gjilan

Sot ka përfunduar afati i konkursit plotësues për pranimin e studentëve në studimet themelore për vitin akademik 2016/2017, në Universitetin “Kadri Zeka” në Gjilan.

Sipas njoftimit kanë aplikuar rreth 600 maturantë deri sot kur edhe është mbyllur konkursi. Universiteti “Kadri Zeka”, do të regjistrojë 779 studentë të rregullt, ku përfshihen studentët që i takojnë familjes së ngushtë të dëshmorëve, studentë nga Presheva, Bujanoci dhe Medvegja, si dhe nga komunitetet jo-shumicë.

Kësaj radhe kandidatët nga Kosova kanë patur mundësinë të aplikojnë vetëm ne Fakultetin Ekonomik, pasi që në këtë Fakultet kanë mbetur vende të lira, por këtë mundësi nuk e kanë patur kandidatët tjerë nga Kosova që kanë shprehë dëshirën të jenë pjesë e Fakultetit të Edukimit, Fakultetit Juridik dhe Fakultetit të Shkencave Kompjuterike, ku vendet për studim janë plotësuar në afatin e parë të konkursit.

Shpresë Qamili, Prorektore për Mësim, Kërkime Shkencore dhe Çështje të Studentëve në Universitetin ”Kadri Zeka” në Gjilan tha se procesi i aplikimit dhe pranimit të dokumenteve ka shkuar në mënyrën më të mirë të mundshëm dhe se nuk kemi pasur ndonjë problem ose parregullsi.

Ndërkohë, në Universitetin “Kadri Zeka” në Gjilan më 19. 09.2016 do të mbahet provimi pranues, ora e mbajtjes së provimit dhe salla do të shpallet në ueb faqen e universitetit www.uni-gjilan.net më datë 17.09.2016, kurse deri më 22 shtator 2016 shpallen rezultatet.

Regjistrimi i kandidatëve të pranuar do të bëhet në administratën e njësive akademike, nga data 26. 09. 2016 deri më datë 30.9.2016 prej orës 9:00 – 15:00.