30 efektivë të ushtrisë shqiptare i bashkohen misionit të KFOR-it në Kosovë

Një grup prej 30 ushtarësh të Forcave të Armatosura të Shqipërisë i janë bashkuar misionit të ndërkombëtar të NATO-s, të koduar “KFOR 1“ në Pejë të Kosovës.

Sipas një njoftimi për shtyp të Ministrisë së Mbrojtjes, ceremonia e nisjes së trupave në këtë mision u zhvillua në prani edhe të Ministrit të Mbrojtjes, Niko Peleshi, shefit të Shtabit të Përgjithshëm të Forcave të Armatosura, gjeneralmajor Bajram Begaj dhe komandantëve të forcave.

Në fjalën e tij, Peleshi e cilësoi këtë një mision të një rëndësie të madhe për Kosovën, por edhe për rajonin e Ballkanit Perëndimor.

“Pas tërheqjes dhe mbylljes së misionit në Afganistan, ne u angazhuam se do të vazhdojmë të rrisim pjesëmarrjen tonë në misione të NATO-s dhe ato ndërkombëtare në përgjithësi dhe ky është rasti. Ne po materializojmë shtimin e prezencës sonë në KFOR, për herë të parë çojmë në këtë mision, misioni “KFOR 1‘ një kontingjent special të djemve dhe vajzave më të mirë që ne kemi në Forcat e Armatosura”, ka thënë Peleshi.

Duke folur për situatën e krijuar në Ukrainë dhe mesazhet e dhëna nga sekretari i Përgjithshëm i NATO, Jens Stoltenberg, ministri Peleshi u shpreh se asnjë pëllembë e Aleancës nuk mund të preket, sepse NATO është aleanca më e fuqishme ushtarake dhe politike në botë.

Nga ana e tij, shefi i Shtabit të Përgjithshëm të FA, gjeneralmajor Bajram Begaj tha se “misione të tilla kanë përgjegjësi edhe për shkak të situatës së pandemisë, por aktualisht, e veçanta përcaktuese është situata shumë e turbullt e sigurisë që po zhvillohet dhe po precipiton në përshkallëzime të rrezikshme dhe tejet kërcënuese në Krahun Lindor të Aleancës”.

“Siguria globale është më shumë se kurrë ndonjëherë e rrezikuar dhe e kërcënuar. Rajoni dhe vendi ynë nuk janë imunë ndaj këtyre veprimeve të Rusisë. Ndaj në këto situata të nxehta ju do të jeni atje për një kuptim të madh që bëhet edhe më kuptimplotë dhe domethënës, për sigurinë, lirinë, paqen, për t’i shërbyer Aleancës dhe vendit tonë”, ka shtuar gjeneralmajori.

Efektivët Komando shqiptarë do të shërbejnë në këtë mision krah aleatëve kroatë dhe italianë. /Telegrafi/