Zyrtare: Taulant Seferi transferohet në Ukrainë te Vorskla Poltava

Taulant Seferi është larguar zyrtarisht nga Tirana pas dy viteve të kaluara në kryeqytetin shqiptar.

Sulmuesi shqiptar karrierën do ta vazhdoj në Ukrainë, ku është transferuar zyrtarisht tek ekipi ukrainas Vorskla Poltava.

Ka qenë faqja zyrtare e Tiranës që ka njoftuar për largimin e Seferit, derisa ka falënderuar sulmuesit nga Kumanova për gjithçka që ka dhënë gjatë kësaj periudhe për fanellën bardhekaltër.

Nga shitja e sulmuesit të Kombëtares së Shqipërisë, Tirana do të fitojë 500 mijë euro.

“Faleminderit Taulant Seferi. KF Tirana njofton transferimin e lojtarit Taulant Seferi në klubin Ukrainas FC Vorskla Poltava dhe shpreh mirënjohjen për kontributin e lojtarit dhe punën e tij të palodhur”.

“Faleminderit për emocionet e panumërta sa herë ke tundur rrjetën. Largohesh si kampion nga Tirona kampione. Kjo fanellë do të mbetet gjithmonë shtëpi për ty. Suksese në rrugëtimin tënd të ri. Të lumtur që arritëm të nxirrnim në pah cilësitë e lojtarit të madh që je”, ka shkruar faqja zyrtare e Tiranës.

Gjatë ditëve të ardhshme Seferi pritet të zyrtarizohet te Vorskla, ku do të gjejë Enur Torten i cili gjithashtu u transferua tek skuadra ukrainase nga Tirana. /Telegrafi/