Zyrtare: Pas shkarkimit të De Rossit, Roma emëron trajnerin e ri

Roma ka njoftuar zyrtarisht se Ivan Juric është trajneri i tyre i ri, vetëm disa orë pasi njoftuan se kishin shkarkuar legjendën e klubit Daniele De Rossi.

Ishte një tronditje këtë mëngjes kur u konfirmua se De Rossi ishte shkarkuar, veçanërisht pasi ai kishte nënshkruar vetëm pak kohë më parë një kontratë të re pasi zëvendësoi Jose Mourinhon në janar.

Trajneri i ri nënshkruan një kontratë njëvjeçare deri në qershor 2025, megjithëse raportohet se ka një opsion për një sezon të dytë.

Ivan Juric è il nuovo responsabile tecnico dell’#ASRoma

📄 https://t.co/pNTrbkqsmz pic.twitter.com/jg58r6lPyW

— AS Roma (@OfficialASRoma) September 18, 2024

Juric është një ish-lojtar në Serie A dhe mbushi 49-vjeç muajin e kaluar, por i mbaroi kontrata pasi vendosi të mos e zgjaste periudhën e tij trivjeçare në Torino.

Rolet e tij të vetme si trajner ishin të gjitha në Itali, në Mantova, Crotone, Genoa, Verona dhe Torino.

Kroati është një nga shumë strategët aktualë që e mësuan zanatin e tyre nën drejtimin e Gian Piero Gasperini, duke punuar si lojtar i tij në Crotone dhe Genoa, pastaj ndihmës trajner në Genoa, Inter dhe Palermo.

Ai mbërriti në terrenin stërvitor të Trigoria pasditen e sotme dhe realizoi seancën e tij të parë me skuadrën e Romës.

Ka qenë një fillim i vështirë i sezonit me vetëm tri barazime dhe një humbje, në të cilën skuadra shënoi vetëm dy gola. /Telegrafi/