ZKA-ja konfirmon se 149 persona të Mbrojtjes Civile kanë marr paga pa qenë në marrëdhënie pune

Zyra Kombëtare e Auditimit (ZKA) ka thënë se janë identifikuar 149 persona të Mbrojtjes Civile, të cilët kanë marr paga përkundër që nuk janë në marrëdhënie pune.

Këtë e konfirmuar auditorja e përgjithshme Vlora Spanca në një intervistë për Telegrafin, duke shtuar vlera e pagesës është mbi 700 euro në vit.

“Kemi potencuar një çështje e cila e përcjell Qeverinë e Kosovës, është ajo e pagesave për punonjësit që nuk e vijojnë punën. Kjo është si rezultat i Marrëveshjes së Brukselit dhe një vendim i Qeverisë që është nënshkruar në vitin 2015 për integrimin e ish-Mbrojtjes Civile në institucionet publike. Numri i tyre është 149 dhe vlera është diku mbi 700 mijë euro në vit”, ka konfirmuar Spanca.

Sipas saj, tashmë këto pagesa janë ndalur.

“Mund të them se këtu ka përmirësime në këtë aspekt, ku Ministria e Arsimit dhe ajo e Ekonomisë e kanë zgjedhur këtë problem, duke iu ofruar kushte dhe punonjësit ka filluar të punojnë, përderisa Ministria e Kulturës me marrjen e raportit, në qershor apo në korrik të vitit të kaluar, ka ndalur pagesat”, ka shtuar ajo.

Lexo po ashtu Kryeauditorja Spanca: Auditimi i katër komunave veriore do të bëhet në momentin më të mirë të mundshëm, ka përmirësim në cilësinë e raportimit financiar

Dy javë më parë, Qeveria e Kosovës kishte marr vendim që t’i shpallë terroriste organizatat serbe Mbrojtja Civile dhe Brigada e Veriut, të cilat operojnë në pjesën veriore të vendit.

Këto dy organizata dyshohet se janë përgjegjëse për shumë krime të kryera në veriun e Kosovës. Pikërisht për këto dyshohet të ketë qenë i destinuar arsenali i armëve i cili u kap para pak ditësh në një veturë në Zveçan.

Mbrojtja Civile në Serbi funksionon në kuadër të Ministrisë së Punëve të Brendshme.

Shpallja e tyre si organizata terroriste vjen në kohën kur tensionet në veri të Kosovës – të banuar me shumicë serbe – janë rritur.

Lexo po ashtu Shpallen terroriste organizatat serbe “Mbrojtja Civile” dhe “Brigada e Veriut”

Serbët lokalë po kundërshtojnë kryetarët e rinj shqiptarë të Zveçanit, Zubin Potokut dhe Leposaviqit që u zgjodhën më 23 prill. Këto votime u bojkotuan nga popullata serbe.

Që nga 26 maji, serbët kanë protestuar në veri dhe që atëherë në këtë zonë janë regjistruar disa sulme me shok-bomba dhe granata dore, që kanë shkaktuar dëme materiale, por pa pasoja në njerëz. /Telegrafi/