LAJMI I FUNDIT:

Zhulali: Jo, diskriminimit të kompozitorëve shqiptarë

Zhulali: Jo, diskriminimit të kompozitorëve shqiptarë

Kompozitori i njohur, Edmond Zhulali, bën kritika për thyerjen e rregullores së sivjetshme të Festivalit të RTSh-së, që për të është cenim i integritetit.

“Rregullorja e festivalit ka funksionuar për vite me radhë si një element shumë i rëndësishëm, që ka vendosur për të gjitha marrëdhëniet e festivalit me pjesëmarrësit, organizatoret etj. Në të janë përcaktuar të gjitha rregullat nga ku buron organizimi i festivalit. Rregullorja ka pësuar çdo vit ndryshime, të cilat konsistojnë në mënyrën se si zhvillohet festivali, numri i këngëve, netëve, të ftuarit etj. Por, kurrsesi elementet kryesore asnjëherë nuk janë diskutuar, si nënshtetësia shqiptare dhe kombësia për shqiptarët në Kosovë, Maqedoni, Mali i zi e diasporë. Ndryshimi i tyre cenon rëndë karakterin kombëtar të festivalit. Për këtë, ‘Albautor’-i ka bërë një reagim shumë të fortë, duke e dënuar këtë ndryshim tinëzar, me qëllime të këqija antikombëtare”, thotë ai. “Përsa i përket jurisë në festival, mungojnë kompozitorët dhe sidomos ata shqiptarë. Nuk e kuptoj pse duhet të vinë nga jashtë dhe në shumicë. Gjoja për paanshmëri? Besoj që jemi aq të aftë sa të zgjedhim këngën e duhur kur Shqipëria në 16 përfaqësime në Eurosong, nëntë herë ka hyrë në finale dhe ka arritur rezultate shumë të mira në renditje”.

Më herët gjatë javës së kaluar, kompozitorë e tekstshkrues si Limos Dizdari, Elton Deda, Eriona Rushiti, Agim Doçi, Xhevahir Spahiu, Jorgo Papingji etj., kanë kritikuar përmes një deklarate organizimin e festivalit, që nga pranimi i kompozitorëve të huaj e deri te konkurrimi me më shumë se një këngë. /GSh/