Zelensky dëshiron të punojë “drejtpërdrejt” me Trumpin për t’i dhënë fund luftës me Rusinë

Presidenti ukrainas, Volodymyr Zelensky ka deklaruar se dëshiron të punojë “drejtpërdrejt” me presidentin e zgjedhur të SHBA-së, Donald Trump për t’i dhënë fund luftës në Ukrainë, duke shtuar se është i hapur ndaj ideve të tij.

“Sigurisht që ne do të punojmë me Trumpin. Unë dua të punoj drejtpërdrejt me të”, tha Zelensky.

“Dua të ndaj me të idetë dhe dua të dëgjoj prej tij idetë e tij,” shtoi ai.

Bëhet e ditur se Shtetet e Bashkuara janë ofruesi i vetëm më i madh i ndihmës ushtarake për Ukrainën.

Sipas Departamentit të Shtetit të SHBA-së, qeveria ka kontribuar me 64.1 miliardë dollarë në përpjekjet luftarake të Ukrainës që kur Rusia nisi agresionin në shkurt 2022.

Zelensky i cilësoi bisedat e tij me Trumpin gjatë një vizite në New York në shtator si “të ngrohta, të mira, konstruktive”, shkruan CNN, përcjell Telegrafi.

Ai tha se diskutimet ishin një “hap i rëndësishëm”, por se do të nevojiteshin bisedime më të detajuara “derisa të projektohet një plan real ku Ukraina është e fortë”.

Ndër tjera, presidenti ukrainas vuri në dukje se shefi i tij i shtabit, Andriy Yermak, do të udhëtonte në SHBA sa më shpejt të jetë e mundur për takime, duke përfshirë takime me të emëruarin e Trumpit si i dërguar special në Ukrainë, Keith Kellogg.

Siç raportohet, Kellogg favorizon një armëpushim dhe bisedime paqeje midis Moskës dhe Kievit, të cilat do të përfshinin garanci sigurie për Ukrainën për t’u mbrojtur nga pushtimet e ardhshme ruse.

Udhëheqësi ukrainas shtoi se ai do të donte që Trump të ketë sukses dhe që SHBA të “luajë një nga pjesët më vendimtare” në përfundimin e luftës.

Ndryshe, përpara se të fitonte zgjedhjet, Trump vazhdimisht pretendonte se lufta Rusi-Ukrainë nuk do të kishte nisur nëse ai do të kishte qenë president.

Ai u zotua gjithashtu se do t’i jepte fund luftës, ndonjëherë edhe duke pretenduar se do të ndalonte konfliktin shumëvjeçar përpara se të merrte detyrën.

Në korrik, ai tha se mund ta zgjidhte konfliktin brenda një dite, pa ofruar detaje të mëtejshme. /Telegrafi/