Zaev-Mitsotakis: Marrëveshja e Prespës është hap historik dhe marrëveshje e rëndësishme në ndërtimin e fqinjësisë së mirë

Kryeministri Zoran Zaev sot në Njur Jork për herë të parë u takua me kryeministrin grek, Kyriakos Mitsotakis.

Në takim, Zaev ka theksuar se Qeveria e Republikës së Maqedonisë së Veriut është e përqendruar maksimalisht në qasje konstruktive në ndërtimin e partneritetit të ndërsjellë bazuar në miqësi dhe interes të përbashkët, njofton Telegrafi Maqedoni.

“Kryeministri Zaev theksoi se Qeveria e Maqedonisë së Veriut është e gatshme në mënyrë të plotë të zbatojë Planin aksional të intensifikimit të bashkëpunimit mes Greqisë dhe Maqedonisë së Veriut, siç është paraparë në Marrëveshjen e Prespës, e cila është marrëveshje historike dhe e rëndësishme në ndërtimin e fqinjësisë së mirë, bashkëpunimit dhe marrëdhënieve konstruktive mes dyja vendeve”, thuhet në njoftimin qeveritar për shtyp.

Zaev ka thënë se është respekt fakti që Greqia është vendi i parë anëtar i NATO-s që ka ratifikuar Protokollin për hyrjen e Maqedonisë së Veriut në NATO.

“Në takim me kryeministrin grek Mitsotakis, kryeministri Zaev e njoftoi për përpjekjet e përforcimit të zbatimit të reformave me qëllim që të nisen bisedimet për hyrje në BE, me çka edhe pret vendim pozitiv në tetor të këtij viti. U shpreh përkrahje nga ana e kryeministrit grek për nisjen e bisedimeve me BE-në dhe u potencua se zbatimi i Marrëveshjes së Prespës është kyçe në avancimin e marrëdhënieve dhe sigurimin e perspektivës evropiane për Maqedoninë e Veriut”, thuhet në njoftim.

Në takim është konkluduar se avancimi i bashkëpunimit ekonomik, rritja e këmbimit tregtar dhe investimet e drejtpërdrejta janë në interes të qytetarëve të dy vendeve./Telegrafi/