“Western Balkans Fund” mban logon e punuar nga dizajneri kosovar, Shpat Konomi

Fondi i Ballkanit Perëndimor, pjesë e të cilit janë Kosova, Shqipëria, Maqedonia, Mali i Zi, Serbia dhe Bosnja e Hercegovina, do të mbajë logon zyrtare të përgatitur nga dizajneri grafik nga Kosova, Shpat Komoni, ka njoftuar Ministria e Punëve të Jashtme.

Konomi ka fituar çmimin kryesor në garën e Fondit të Ballkanit Perëndimor (Western Balkans Fund) për logon zyrtare të kësaj organizate, për të cilin fond Ministria e Punëve të Jashtme e Republikës së Kosovës ka ndarë 30 mijë euro.

Ndërkohë, edhe çmimi i tretë është fituar nga dizajneri grafik, Gent Shala.

Në garën rajonale kanë janë paraqitur 18 propozime, ku dy nga tre vendet e para i kanë zënë dizajnerët nga Kosova. Vendi i dytë i ka takuar një dizajneri nga Banja Lluka e Bosnje e Hercegovinës.

Dy fituesit kosovarë të kësaj gare janë pritur nga drejtori për Çështje Rajonale në Ministrinë e Punëve të Jashtme, Fitim Gllareva, i cili e ka vlerësuar lart punën e kreatorëve nga Kosova.

Duke i falënderuar për punën, Gllareva ka thënë se çmimet e fituara i kanë bërë nder edhe Kosovës.

Fondi për Ballkanin ka për qëllim promovimin dhe zhvillimin e bashkëpunimit kulturor; promovimin dhe zhvillimin e shkëmbimeve akademike, hulumtimit dhe bashkëpunimit në fushën e arsimit në mes të palëve nënshkruese; promovimin dhe zhvillimin e shkëmbimeve në mes të rinjve, si dhe promovimin e zhvillimit të qëndrueshëm mes palëve kontraktuese.

Fondi i Ballkanit Perëndimor ka selinë në Tiranë dhe se Kosova është anëtare e barabartë në të gjitha nivelet në këtë organizatë ndërkombëtare dhe rajonale. /Telegrafi/