Walker: Do të isha krenar të varrosesha në fshatin Reçak

Ish-ambasadori i OSBE-së, William Walker mori pjesë të mërkurën në homazhet në Reçak, në 26-vjetorin e masakrës. 26 vjet më parë, ishte i pari që i tha botës që në Reçak po kryhet krim kundër njerëzimit.

Walker po ashtu gjatë vizitës në Kosovë, të mërkurën promovoi librin “Historia e një krimi lufte Reçak”, i cili përshkruan përjetimet e tij personale lidhur me masakrën që tronditi komunitetin ndërkombëtar dhe ndikoi në ndërhyrjen e NATO-s në Kosovë.

Lidhur me ai tha se i vjen keq që ky libër u publikuar 25 vjet pas masakrës, por sipas tij, ndonëse u publikua me vonesë është i kënaqur që ka dëgjuar nga liderët shtetëror se ky libër do të jetë vlerë e paraqitjes së vërtetës së Kosovës.

“Reçaku jo vetëm që e prezanton të kaluarën e tmerrshme që Serbia ia ka bërë shqiptarëve… por, për  mua tani Reçaku prezanton tani diçka të ndritshme që është e ardhshmja e Republikës së Kosovës.

Dje, presidentja dhe kryeministri më kanë pyetur nëse kam menduar ndonjëherë të jem qytetar i Kosovës…siç mund ta imagjinoni përgjigja ime në këtë pyetje do të ishte, po natyrisht”, tha të mërkurën ambasadori Walker.

“… Me këtë në mendje, kam në ndjenjë se vitin tjetër para se të më shihni në Reçak mund të jem në arkivol dhe do të isha krenar të varrosesha këtu në Reçak”, tha ai. /Telegrafi/