Viti për ta pushtuar Evropën: Yjet e rinj nga Kosova që synojnë transferime në arenën evropiane

Në zemër të Ballkanit, ku fusha e futbollit është më shumë se një sport, është një mënyrë jetese, një brez i ri i lojtarëve të talentuar po ngrihet me ambicie për të lënë gjurmë jo vetëm në Kosovë, por edhe përtej kufijve të saj.

Viti 2025 pritet të jetë viti ku shumë futbollistë të talentuar nga Kosova nën 22-vjeç pritet të marrin rrugën për një karrierë edhe më të ndritshme në Evropë, pasi në Kosovë ata vetëm se kanë filluar të lënë gjurmë.

Me përkushtimin e tyre, talentin e lindur dhe punën e madhe që po bëjnë, një gjeneratë e artë e futbollistëve nga Kosova pritet t’i kalojnë muajt e fundit në vendin e tyre të lindjes dhe po presin kontrata nga klubet evropiane.

Futbolli i Kosovës ka nxjerr yje të mëdha të cilët po lënë gjurmë edhe në top pesë ligat evropiane si Amir Rrahmani, Edon Zhegrova, Milot Rashica, Vedat Muriqi e të tjerë dhe vendi ynë është bërë shumë atraktiv për agjentë të ndryshëm dhe klubet evropiane.

Talente që po shkëlqejnë në Superligën e Kosovës

Lindon Emërllahu është duke kaluar momentet e fundit te Ballkani. Mesfushori defensivë është një nga futbollistët më premtues në Kosovë dhe së fundmi ai është shpallur lojtar i vitit dhe është pjesë e rëndësishme e Kombëtares së Kosovës.

Emërllahu ka pasur oferta edhe në verë, megjithatë viti 2025 duket se është i duhuri për transferimin e tij jashtë kufijve të vendit.

Malisheva është padyshim klubi me më së shumti talente në radhët e tyre. Drilon Hazrollaj, Etnik Brruti dhe Laurent Xhylani janë treshja ofensive që kanë shkëlqyer me skuadrën e Bekim Isufit dhe pritet të bëjnë hapin e madh.

Gjasat më të mëdha për të dalë në Evropë i ka padyshim Hazrollaj, derisa aty ndodhet edhe Brruti. Te Malisheva është edhe mbrojtësi i majtë 23-vjeçar Arlind Veliu i cili gjithashtu pritet të largohet drejt Evropës.

Yll Ibrahimi nga Gjilani është një mbrojtësi i majtë i cili ka treguar aftësi të jashtëzakonshme në krijimin e rasteve, por edhe në defensivë. Ai është një lojtar që mund të bëjë diferencën në çdo ndeshje dhe është i gatshëm për të bërë një hap drejt klubeve  evropiane që kërkojnë mbrojtës të rinj dhe të talentuar.

Një tjetër talent i madh në futbollin kosovar është edhe sulmuesi anësorë i Llapit, Elvir Gashijani. Talenti kosovar ka shkëlqyer edhe me Kombëtaren U19 dhe në janar ose më së largu në verë pritet të largohet drejt një kampionati më të fortë evropian.

Në kryeqytetin e Kosovës, Prishtina, Dion Gallapeni, Ardi Ajdini dhe Rigon Llugiqi janë tre lojtarë që kanë shpërthyer në Superligën e Kosovës. Gallapeni, me kontrollin e tij të mrekullueshëm të topit dhe vizionin e tij të qartë për lojën, është një aset i çmuar për çdo skuadër, ndërsa Ajdini është i njohur për aftësitë e tij mbrojtëse dhe qetësinë nën presion. Llugiqi është një tjetër talent që ka shfaqur potencial të madh në mesfushë në debutimin e tij këtë stinor në Superligë.

Hekuran Berisha dhe Erlis Xhemajli nga Dukagjini janë dy emra të tjerë që janë në radarët e skautëve ndërkombëtarë. Berisha ka treguar një intuitë të jashtëzakonshme për golin duke shënuar gjashtë herë në Superligë, derisa Erlis Xhemajli ka shkëlqyer në mesfushë duke u bërë lider i klinasve.

Gentrit Ramusa nga Ferizaj dhe Arvanit Rexhaj nga Suhareka janë dy yje të tjerë në ngritje. Ramusa ka shkëlqyer në mesfushën e ferizajasve duke qenë një lider te kjo skuadër duke shkatërruar aksionet e kundërshtarëve dhe duke ndërtuar të skuadrës së tij. Ndërsa Rexhaj ka treguar aftësi të shkëlqyera në mesfushë dhe është bërë një lojtar kyç për ekipin e tij. /Telegrafi/

Lindon Emërllahu (Ballkani)

Drilon Hazrollaj (Malisheva)

Etnik Brruti (Malisheva)

Yll Ibrahimi (Gjilani)

Dion Gallapeni (Prishtina)

Ardi Ajdini (Prishtina)

Hekuran Berisha (Dukagjini)

Elvir Gashijani (Llapi)

Gentrit Ramusa (Ferizaj)

Erlis Xhemajli (Dukagjini)

Rigon Llugiqi (Prishtina)

Arvanit Rexhaj (Suhareka)

Laurent Xhylani (Malisheva)