Veseli: Me këtë opozitë edhe 50 vjet do të mbesim në pushtet

Seanca e radhës e Kuvendit të Kosovës do të mbahet të enjten ku njëra nga pikat është draft deklarata e hartuar nga grupet parlamentare, me anë të së cilës kërkohet nga BE që liberalizimi i vizave për qytetarët e Kosovës të bëhet pa kushte.

Kryetari i Kuvendit, Kadri Veseli tha pas mbledhjes së Kryesisë se njëra nga pikat është që të tejkalohet dënimi nga BE sa i përket demarkacionit.

Veseli me këtë rast shpreson se do të kenë mirëkuptim edhe nga opozita në lidhje me demarkacionin.

Sipas tij, qëndrimi i opozitës për demarkacionin është gabim dhe se pozita do të qëndrojë në pushtet edhe 50 vjet me këto sjellje të opozitës.

Veseli me këtë rast ka përmendur edhe çështjen e koalicionin qeverisës dhe se mund të qëndrojë deri në vitin 2018.

Shefi i Grupit parlamentar të AAK-së Pal Lekaj tha se në seancën e radhës do të ketë pika për rehatimin e partiakëve nëpër borde.

Sipas tij kjo Qeveri duhet të shkojë dhe të mbahen zgjedhjet. Njëjtë kanë deklaruar edhe anëtarët e VV-së dhe Nismës.

Ndërsa, Ismet Beqiri nga LDK tha se koalicioni qeverisës është stabil.