Veseli falënderon mullisët që po prodhojnë bukë edhe në kohën e pandemisë

Kryetari i Partisë Demokratike të Kosovës, Kadri Veseli ka falënderuar të gjithë punëtorët që gjatë këtyre ditëve po punojnë në mulli, derisa këta të fundit i quajti heronj të Kosovës.

Gjatë vizitës në mullirin “Vali” në Sllatinë të Fushë Kosovës, ai u informua për kapacitet prodhuese të miellit në kohë pandemie.

“Në fakt heronjtë e Kosovës, ku në kohen më të rëndë kur jemi ballafaquar me vet bukën, kanë punuar natë e ditë që asnjë fëmijë i Kosovës, asnjë qytetar i vendit mos të jetë pa bukë. I falënderoj të gjithë mullixhinjtë e Kosovës të cilët me bukën tonë me grurin tonë kanë arritur ta mbajnë situatën në mënyrë të kënaqshme dhe stabile”, tha Veseli.

Ai tha se në këtë kohë kur po falënderohen të gjithë punonjësit shëndetësorë dhe ata të Policisë së Kosovës, punë të madhe po bëjnë edhe punëtorët në furra e mullinj, të cilit po punojnë pa pushim.

Ndërsa, pronari i mullirit, siguroi se nuk ka mungesë të millit, sipas të cilit edhe nuk ka nevojë për panik.

“Kjo rrethinë nuk ka qenë me mungesë të miellit, dhe për atë jam i sigurt se kanë miell edhe për dy muaj sot nëpër shtëpia. Por u bë eufori e madhe por ja dolëm edhe kësaj. Sot janë hapur të gjithë kufijtë, po bartet edhe miell edhe grurë, nuk është për panik”, tha Rrahmani.

Veseli gjatë ditës vizitoi edhe Komunën e Fushë Kosovës, ku u prit nga kryetari Burim Berisha. /KP/