Vesel Memedi: Padi për “uzurpatorët” e organeve të RDK-së

Vesel Memedi, kryetari i RDK-së i cili u sfidua nga disa anëtarë të kësaj partie dhe më pas sipas tyre u shkarkua si drejtues i kësaj partie thotë se do të ngrejë padi për siç i quan ai “uzurpuesit” e organeve partiake.

Sipas tij, statuti i partisë thotë se Kuvendi vetëm e zgjedh Kryetarin por nuk mund ta shkarkojë. Këtë mundësi e ka vetëm kongresi i partisë, dhe nëse kongresi e shkarkon, ai do ta pranojë këtë vendim. Këto deklarata ai i bëri gjatë intervistës për Programin 200, të gazetarit Nazim Rashidi, e cila do të transmetohet sonte në ora 22.30. në Alsat M.

Veseli në intervistë flet edhe për marrëdhëniet e tij me Rufi Osmanin dhe Lëvizjen “Besa”
Ai thotë se Rufi Osmani ka kërkuar bashkëpunim me çdo kusht të RDK-së me Lëvizjen “Besa”. Kjo ka bërë sipas tij që të dy, dikur bashkëpunëtorë të ngushtë, të ndahen për shkak të koncepteve të ndryshme.
Vesel Memedi përjashton bashkëpunim me Lëvizjen “Besa” për shkak se siç thotë ajo “në platformë ka përçmimin, nënçmimin” ndaj personalitetit të tij dhe kështu me radhë./Telegrafi/