Vdes James Harrison, burri i cili shpëtoi jetën e më shumë se dy milionë foshnjave me dhurimet e tij të gjakut

Një burrë australian, dhurimet e gjakut të të cilit janë merita për shpëtimin e jetës së më shumë se 2 milionë foshnjave, ka vdekur në moshën 88-vjeçare.

James Harrison, nga qyteti i Junee në shtetin e Uellsit të Ri Jugor, vdiq në gjumë në një shtëpi pleqsh më 17 shkurt, konfirmoi familja e tij.

I mbiquajtur “burri me krahun e artë”, Harrison shpëtoi 2.4 milionë foshnja duke dhuruar plazmë mbi 1100 herë, sipas Kryqit të Kuq Australian.

Bëhet e ditur se Harrison filloi të dhuronte gjak si 18-vjeçar në vitin 1954, katër vjet pasi kishte marrë një seri transfuzionesh pas operacionit në mushkëri.

Thuhet se ai nuk ka humbur kurrë një takim për dy javë në më shumë se gjashtë dekada të dhurimit, përpara se të tërhiqej si donator në 2018 në moshën 81-vjeçare.

Meqenëse plazma e tij përmbante një antitrup të rrallë të quajtur Anti-D, mjekët e përdorën atë për të ndihmuar nënat, gjaku i të cilave rrezikohej të sulmonte foshnjat e tyre të palindura.

Tracey Mellowship, vajza e Harrison, i bëri homazhe babait të saj të ndjerë, duke e lavdëruar atë për punën e tij humanitare dhe humorin e tij, shkruan euronews, përcjell Telegrafi.

“Ai ka lënë pas një familje që mund të mos kishte ekzistuar pa donacionet e tij të çmuara”, tha Mellowship.

“Ai ishte gjithashtu shumë krenar që kishte shpëtuar kaq shumë jetë, pa asnjë kosto apo dhimbje. E bëri të lumtur të dëgjonte për familjet e shumta si kjo e jona, që ekzistonin për shkak të dashamirësisë së tij”, shtoi ajo.

Stephen Cornelissen, shefi ekzekutiv i Lifeblood, një divizion i Kryqit të Kuq Australian, falënderoi Harrison që ishte një njeri “i shquar, stoik i sjellshëm dhe bujar”.

“James zgjati krahun e tij për të ndihmuar të tjerët dhe foshnjat që nuk do t’i njihte kurrë 1173 herë dhe nuk priste asgjë në këmbim”, tha Cornelissen.

“Ai la pas një trashëgimi të jashtëzakonshme dhe ishte shpresa e tij që një ditë, dikush në Australi do të mposhtte rekordin e tij të dhurimeve”, shtoi ai.

“Në emër të Lifeblood dhe të gjithë komunitetit australian, ne falënderojmë James për kontributin e jashtëzakonshëm që ai dha dhe shpëtoi miliona jetë”, përfundoi shefi i Lifeblood.

Ndryshe, edhe pas vdekjes së tij, Harrison do të vazhdojë të shpëtojë jetët e foshnjave të palindura.

Në një projekt bashkëpunues, Instituti i Kërkimeve Mjekësore Walter dhe Eliza Hall (WEHI) dhe Lifeblood kanë rritur me sukses antitrupin e Harrison në një laborator.

Studiuesit shpresojnë se ky zbulim mund të parandalojë një ditë sëmundjen hemolitike të fetusit dhe të porsalindurit (HDFN) për gratë në mbarë botën.

Raportohet se ka vetëm 200 donatorë Anti-D në Australi, gjaku i të cilëve ndihmon rreth 45,000 nëna dhe foshnjat e tyre të palindura çdo vit. /Telegrafi/