Një pasim të bukur të Paul Pogbas e priti Arturo Vidal për ta kompletuar me golin e parë (14’).
Mesfushori kilian realizoi edhe golin e dytë personal (27’), kësaj radhe asistoi Leonardo Bonucci.
Miroslav Klose i ktheu mysafirët në lojë duke ngushtuar rezultatin (28’) që pas 45 minutash ishte 2-1.
Në fraksionin e parë luajti mirë mesfushori shqiptar, Lorik Cana, i cili veç angazhimeve në mbrojtje ishte i rrezikshëm edhe në sulm.
Fillimi i pjesës së dytë ishte fatal për Biancocelestët. Mirko Vucinic i dha fund dilemës për fituesin pas një tjetër asistimi të bukur të Bonuccit (49’).
Edhe më keq për kryeqytetasit u bë kur Hernanes u përjashtua me kartonin e dytë të verdhë (63’).
Pak minuta pasi e goditi shtyllën, Carlos Tevez realizoi edhe golin e katërt të Bianconerëve (80’). Asistimi ishte i Vidal.
Juventusi ka gjashtë pikë pas dy xhirosh, aq sa ka edhe Napoli. /Telegrafi/
