Vangjush Dako kërkon lirinë në Gjykatën e Apelit

Ish-kryebashkiaku i Durrësit, Vangjush Dako, i arrestuar me kërkesë të Prokurorisë së Posaçme SPAK për “shpërdorim të detyrës” kërkon të lirohet nga qelia.

Avokatët e tij kanë ankimuar në Gjykatën e Apelit masën e sigurisë “arrest në burg” caktuar nga Shkalla e Parë një javë më parë dhe vendosjen e masës së sigurisë “arrest në shtëpi”.

Në seancën e zhvilluar rreth një javë më parë në GJKKO, ish-numri një i qytetit të Durrësit mohoi akuzat, duke pretenduar se ka zbatuar ligjin dhe se ka firmosur mbi akte të përgatitura nga specialistët.

Lexo po ashtu Zbardhet vendimi i gjykatës, lihet në burg Vangjush Dako

Dy kallëzime penale ishin ato që vunë në lëvizje Prokurorinë e Posaçme Anti Korrupsion për ish-kreun e Bashkisë Durrës, hetime që u përmbyllën me arrestimin e tij dhe 9 personave të tjerë.

Në dosjen hetimore që çoi pas hekurave Dakon rezulton se ish-kryebashkiaku akuzohet për shpërdorim detyre dhe falsifikim të dokumenteve.

Kallëzimi i parë është bërë nga banorët e një pallati në lagjen numër 5, godinë e cila u bë e pabanueshme pas tërmetit të vitit 2019. Sipas banorëve, leja e ndërtimit ishte dhënë në kundërshtim me ligjin, pasi pallati përfundoi me 4 kate shtesë.

Kallëzimi i dytë është bërë nga ish-kreu i PD-së Durrës, Ferdinand Xhaferraj, sipas të cilit, Dako shpërdoroi fondet publike për një rrugë që u tenderua, por nuk u realizua. Padia e Xhaferrajt mbështetet edhe nga dy raporte të Kontrollit të Lartë të Shtetit, ku për projektin e rrugës së Plazhit nga Bërryli deri në Currila, i është shkaktuar një dëm buxhetit të shtetit në shumën 18 milionë lekë.

Sipas SPAK, Vangjush Dako, jo vetëm nuk ka marrë masa për Kontrollin e Komisionit të Llogaritjes së Fondit Limit, por ka miratuar dhe urdhrin e prokurimit me vlerën e propozuar nga ky komision, çka i është shkaktuar dëm shtetit në vlerën 18 milionë Lekë. /Telegrafi/