Ushtarët izraelitë po planifikojnë një sulm në një spital në jug të Gazës, pacientët duhet të ikin

Mjekët dhe gazetarët ndërkombëtarë thonë se forcat izraelite po lëvizin drejt spitalit më të madh në Khan Younis, që do të thotë se pacientët dhe ata që kërkuan strehim brenda spitalit duhet të ikin.

Dhjetëra njerëz me batanije dhe dyshekë largohen nga kompleksi spitalor Al Nasser në jug të Gazës, transmeton Telegrafi.

Mjeku amerikan Thaer Ahmad, nga një ekip mjekësh amerikanë dhe britanikë nga OJQ-ja MedGlobal që punon në spital, i tha CNN se ushtria izraelite po afrohet.

“Spitali po dridhet dhe ka panik”, tha mjeku amerikan në një audio mesazh dërguar CNN nga spitali Al Nasser, ku në sfond dëgjohej zhurma e armëve.

Më herët, ushtria izraelite tha se Hamasi kishte kryer së fundmi një sulm ndaj Izraelit, duke pretenduar se sulmi ishte kryer nga brenda afërsisë së spitalit.

Izraeli ka akuzuar vazhdimisht Hamasin për shfrytëzimin e civilëve si mburoja njerëzore duke përdorur spitalet dhe zonat përreth si lokacione ushtarake.

Më herët, ministri i Mbrojtjes i Izraelit tha se faza intensive e ofensivës së tij ushtarake në Gaza do të përfundojë së shpejti. /Telegrafi/