Ulen eksportet Shqipëri-Kosovë

Raporti i fundi i Tregtisë së Jashtme të mallrave, publikuar nga Instituti i Statistikave (INSTAT), ndonëse tregon për një rritje të eksporteve dhe importeve të mallrave gjatë vitit 2017, shifrat janë dëshpëruese në raport me Kosovën për muajin dhjetor 2017, për të cilën u trumbetua një angazhim i shtuar i Qeverisë shqiptare, shkruan Shekulli.

Ulja e eksporteve mes dy vendeve ka qenë me 14 për qind, ndonëse si muaj festash dhjetori duhet të shënonte rritjen më të lartë.

Për vitin 2017 eksportet e mallrave arritën vlerën 273 miliardë lekë, duke u rritur me 12.1 për qind, krahasuar me një vit më parë dhe importet e mallrave arritën vlerën 626 miliardë lekë, duke u rritur me 8.1 për qind, krahasuar me një vit më parë. Deficiti tregtar arriti vlerën 353 miliardë lekë, duke u rritur me 5.2 për qind krahasuar me 2016-në.

Në muajin dhjetor 2017, vendet me të cilët Shqipëria ka pasur rritje më të madhe të eksporteve, në krahasim me dhjetor 2016 janë Italia me 17 për qind, Gjermania me 16.8 për qind dhe Maqedonia me 19.3 për qind. Ndërsa vendet me të cilat eksportet kanë pasur uljen më të madhe janë Kosova me -14.7 për qind, Spanja me -3.6 për qind dhe Greqia me -17 për qind.

Rritja vjetore e eksporteve prej 0.6 për qind, këtë muaj është ndikuar kryesisht nga grupet tekstil dhe këpucë me 4.6 pikë përqindje, ushqim, pije dhe duhan me 1.9 pikë përqindje, materiale ndërtimi dhe metale me 1.8 pikë përqindje. Grupi që ka ndikuar negativisht në ndryshimin vjetor të eksporteve, është minerale, lëndë djegëse, energji elektrike me -10.5 pikë përqindje.

Gjatë këtij viti, vendet me të cilët Shqipëria ka pasur rritje më të madhe të eksporteve, në krahasim me një vit më parë, janë Italia me 9.9 për qind, Kosova me 26 për qind dhe Spanja me 87.5 për qind, ndërsa vendet me të cilat eksportet kanë pasur uljen më të madhe, janë Turqia me -24 për qind, Zvicra me -48 për qind dhe Holanda me -4 për qind.

Në muajin dhjetor 2017, vendet me të cilët Shqipëria ka pasur rritje më të madhe të importeve, në krahasim me dhjetorin e 2016-së janë Italia me 1.4 për qind, Greqia me 9.5 për qind dhe Turqia me 4.7 për qind, ndërsa vendet me të cilat importet kanë pasur uljen më të madhe janë Kina me -1.2 për qind, Gjermania me -27.3 për qind dhe Shtetet e Bashkuara me -7.8 për qind. Gjatë këtij viti, vendet me të cilët Shqipëria ka pasur rritje më të madhe të importeve, në krahasim me një vit më parë, janë Italia me 5.7 për qind, Turqia me 11.2 për qind dhe Greqia me 9.2 për qind, ndërsa vendet me të cilat importet kanë pasur uljen më të madhe, janë Gjermania me -7.7 për qind, Kina me -2.6 për qind dhe Franca me -4.4 për qind.

Shkëmbimet tregtare me vendet e BE zënë 66.3 për qind e të gjithë tregtisë. Në dhjetor të 2017-së, eksportet drejt vendeve të BE-së zënë 78.3 për qind të eksporteve dhe importet nga vendet e BE-së zënë 62 për qind të importeve. Partnerët kryesorë tregtarë janë Italia me 34.6 për qind, Kina me 6.8 për qind, Greqia me 6.5 për qind dhe Gjermania me 6.3 për qind. /Telegrafi/