UBT bashkëpunim me “Yıldız Technical University” dhe Technopark, qendrën më të madhe teknologjike në Stamboll

Në kuadër të vizitës në Turqi, rektori i UBT-së, prof.dr. Edmond Hajrizi, vizitoi edhe parkun e zhvillimit teknologjik – YTÜ Technopark, ku u prit nga kryetari i Bordit Drejtues, prof.dr Bahri Şahin.

Në rrugën e modelit universitar sipërmarrës të shekullit të 21-të, Yıldız Technical University, në vitin 2003, themeloi parkun e zhvillimit teknologjik – YTÜ Technopark, me vizionin për t’u bërë një qendër ndërkombëtare e bashkëpunimi ku idetë e reja shndërrohen në rezultate inovative.

Rektori Hajrizi dhe prof.dr. Bahri Şahin ranë dakord për bashkëpunim ndërmjet YTÜ Technopark në Stamboll dhe Parkut Shkencor Inovativ të UBT-së në fushën e start-up, bashkëpunimit të përbashkët me industrinë, si dhe sjelljen e investimeve te huaja në parqet respektive.

YTÜ Technopark ka një hapësirë prej 148.000 m2, brenda të cilit janë akomoduara 330 kompani kërkimi dhe zhvillimi, 111 inkubatorë biznesi me më shumë se 8,000 punonjës të kualifikuar në fushën e kërkimit dhe zhvillimit si; softuer, teknologji informacioni dhe komunikimi, telekomunikacion, elektronikë, farmaceutikë, makineri dhe pajisje, hapësirë ajrore, energji, mbrojtje, ndërtim, ushqim, etj.

Parku Shkencor Inovativ i UBT-së, po ashtu është i pajisur me teknologjinë e së ardhmes, Qendrën e Teknologjisë 5G, Qendrën e Realitetit Virtual “EON Reality, Augmented and Virtual Center”, mbi 150 laboratorë të ndryshëm shkencor e kërkimor, inkubatorin e biznesit, qendrën e start-up, atë të inovacionit, transferit teknologjik si dhe qendrat e tjera për një mbështetje moderne të ndërmarrësisë, shkencës, teknologjisë dhe inivacionit.

Në parkun e UBT-së, gjithasht  janë të vendosura rreth 100 Spin-offs të fushave të ndryshme të jetës, duke qenë kështu parku i vetëm i këtij lloji në rajonin tonë.

Të dyja këto parqe teknologjike janë anëtare të asosacionit ndërkombëtare për parqe shkencore dhe teknologjike – IASP.

Rektori Hajrizi nënshkruan marrëveshje bashkëpunimi me “Yıldız Technical University” në Stamboll

Rektori i UBT-së, prof.dr. Edmond Hajrizi, gjatë vizitës zyrtare në Turqi, ka arritur disa marrëveshje bashkëpunimi me universitete të njohura atje.

Në ditën e parë të kësaj vizite, rektori Hajrizi u prit në takim nga rektori i “Yıldız Technical University”, me seli në Stamboll, prof.dr. Tamer Yılmaz.

Rektori Hajrizi në emër të UBT-së dhe rektori Yilmaz nga “Yıldız Technical University” pas takimit të frytshëm nënshkruan një marrëveshje bashkëpunimi në mes të këtyre dy institucioneve, e cila parasheh inkurajimin e kontaktit dhe bashkëpunimin e drejtpërdrejtë ndërmjet stafit akademik e shkencor si dhe ndërmjet studentëve. Të dy institucionet do të përpiqen të bashkëpunojnë në arsim dhe kërkim në fusha me interes të përbashkët.

Marrëveshja përveç hulumtimeve të përbashkëta parasheh edhe shkëmbim të studentëve, të stafit akademik e shkencor, ligjërata të përbashkëta përmes e-learning, pjesëmarrje në seminare dhe takime akademike, shkëmbim të materialeve të publikuara akademike dhe informacioneve të tjera.

Rektori i UBT-së, prof.dr. Edmond Hajrizi e vlerësoi lartë arritjen e kësaj marrëveshjeje, me një prej universiteteve më të vlerësuara në botë.

“UBT po krijon çdo ditë e më shumë aleat të fortë të dijes e shkencës kudo nëpër botë. Në këtë kuadër është edhe marrëveshja e nënshkruar sot me ‘Yıldız Technical University’  një ndër universitetet më të mira në botë”, u shpreh rektori Hajrizi, i cili do të qëndroi për disa ditë në Turqi, ku do të ketë takime të rëndësishme me institucionet akademike e shkencore atje.

Yıldız Technical University është renditur në mesin e 100 universiteteve më të mira në botë. Në 26 lëndë mësimore ky universitet është renditur krye të universiteteve më të mira botërore.