U bë viral në “TikTok” me vallëzimet e tij, profesori nga Vushtrria pre e bullizmit në mediat sociale

Vallëzimet e tija të publikuara në rrjetin social “TikTok” bëri që profesori Lulzim Paci nga Vushtrria të fitoj zemrat e mijëra përdoruesve të këtij rrjeti, madje mori edhe epitetin si “Profa i Tik Tok-ut”.

Por jo të gjithë e mirëpriten këtë veprim të profesorit Paci. Shumë kritika erdhën në adresë të tij, derisa ai duke folur për këtë gjë një intervistë për KTV-në, shpërthej në lot.

Ai tha se vëllait të tij, i ka thënë se nëse ndihet i turpëruar, të mos tregojë se e ka vëlla.

“I thashë vëllait tim, nëse të pyesin se çka e ke Lulzim Pacin, thuaj kushëri. Mos i thuaj vëlla”, deklaroi Paci derisa ia nisi të qajë.

Reagime për sjelljen e profesorit në “Tik Tok” pati edhe nga deputetë të Kuvendit të Kosovës, të cilët këtë veprim të profesorit e quajtën si të pahijshëm.

Ishte deputetja e LVV-së, Fjolla Ujkani ajo e cila kërkoi nga Gjimnazi “Eqrem Çabej” në Vushtrri dhe Drejtoria e Arsimit që të marrin masa.

“Të dashur qytetarë të Vushtrrisë, në veçanti juve nxënës të Gjimnazit ‘Eqrem Çabej’- Vushtrri, dhe juve prindër. Ditëve të fundit njëri nga profesorët e Gjimnazit ‘Eqrem Çabej’ është duke publikuar video të tij, të cilat janë veprime të pahijshme dhe degjeneruese. Andaj, i bëj thirrje drejtorit të Gjimnazit dhe drejtorisë së Arsimit në Vushtrri, që të marrin masa ndaj profesorit në fjalë. Sepse veprimet tij përmes videove lënë të kuptojnë, që një profesor i tillë nuk mund të arsimoj dhe edukoj kategorinë më të çmueshme të shoqërisë, rininë tonë”, thuhej në reagimin e Ujkanit të publikuar më 27 janar.

Lidhur me komentet negative në adresë të profesorit Lulzim Paci, kanë reaguar edhe fytyra të njohura të ekranit. Një reagim duke i dhënë mbështetje profesorit Paci, e ka bërë aktori i njohur Fatmir Spahiu.

Ai përmes një postimi në Facebook, ka shkruar se “vallëzimi i tij mund të nxitë edhe shumë të tjerë të shfaqin pasionet e tyre”.

“Profesorit të Biologjisë, unë personalisht i dëshiroj vetëm vallëzim të këndshëm dhe të mos e ndal pasionin e tij. Boll mirë po kcejke. Ky është një problem i shoqërisë tonë, problem shumë i madh bullizimi i të gjithë atyre që kanë dëshirë të shfaqin diçka që e kanë pas pasion e dëshirë. Mos të harrojmë, ky profesor nuk është nga ata që i kemi pa tu ra shuplakë naj nxënësi, as ngacmim seksual e tragjedi tjera. Njerit i vallëzohet e le të vallëzoj në sallonin e ti. Vallëzimi i ti mund të nxitë edhe shumë të tjerë të shfaqin pasionet e tyre. Bile edhe nxënësit e ti. Sidomos kur dihet që vallëzimi është shumë i mirë për të krijuar një stabilitet mendor e shëndetësor dhe mbi të gjitha është antistres. Unë nuk kam TikTok për me përcjell, por hatri i ti do ta hapi një në mënyrë që ta përcjelli me qef. Të lumtë, suksese prof.”, ka shkruar Spahiu.

Në anën tjetër analisti politik Agron Demi ka akuzuar mediat të cilat në njëfarë forme po e mbështesin bullzimin.

“Bullizmi si strategji e mediave. Sa e sa raste, mediat kanë shku dhe kanë gjetë persona tërësisht privat, i kanë vu para kamerës, dhe i kanë ekspozu për të gjithë për me i fy një vend i tërë? Edhe asnjë rast nuk është dënuar prej Komisionit të Pavarur të Mediave. E të njëjtën gjuhë e sjellje e ke edhe në debate televizive, përveçse aty bullistat edhe paguhen me pare. E gërditshme e rrezikshme”, ka shkruar Demi. /Telegrafi/