Twitter teston opsionin që grumbullon lajmet e rëndësishme, për t’ia shfaqur shfrytëzuesve në mëngjes (Foto)

Rrjeti social Twitter po e teston një opsion të ri, që iu mundëson të mësoni të gjitha lajmet më të rëndësishme që në mëngjes.

Përditësimi që për momentin po testohet në aplikacionin Android, grumbullon informatat më të rëndësishme dhe i vë në krye të llogarive, teksa ka sipër paralajmërimin “mësoni se çfarë iu ka humbur, kur ju nuk ishit të kyçur”, transmeton Telegrafi.

Menaxheri i produkteve në Twitter, Wally Gurzynski ka thënë se ky opsion iu ndihmon shfrytëzuesve që t’i marrin lajmet që iu kanë ikur, që nga hera e fundit kur kishin qasje në Twitter.

“Njerëzit hyjnë në Twitter, për të marrë lajme dhe të lexojnë bisedat që i rrethojnë ato. Me këtë opsion, do t’ju mundësojmë shfrytëzuesve t’i marrin lajmet, të cilat janë shpërndarë dhe diskutuar prej ndjekësve të tyre” ka thënë Gurzynski.

Mashable ka siguruar disa fotografi, që tregon disa prej lajmeve të mundshme, që Twitter i ka vënë në krye të llogarive, derisa nuk thuhet data se kur lansohet ky përditësim. /Telegrafi/