Tri parti bien dakord për një koalicion në Austri, duke mbajtur jashtë partinë e ekstremit të djathtë

Pas pesë muajsh bisedimesh, partia liberale Neos votoi për të hyrë në një marrëveshje koalicioni me socialdemokratët e qendrës së majtë (SPÖ) dhe konservatorin austriak Peo.

Sipas mediave të huaja, përcjell Telegrafi, të tri partitë kishin njoftuar marrëveshjen e koalicionit javën e kaluar, por anëtarët e partisë liberale Neos duhej ende të miratonin marrëveshjen për t’u bashkuar me qeverinë.

Qeveria e re do të betohet të hënën, duke i dhënë fund pritjes pesë mujore që kur partia e ekstremit të djathtë austriake FPÖ (Partia e Lirisë) doli në krye të zgjedhjeve kombëtare me rreth 29% të votave.

Kjo ishte periudha më e gjatë në politikën austriake për formimin e një koalicioni.

Aleanca midis tri partive ishte një nga alternativat e fundit për të shmangur zgjedhje të parakohshme, të cilat sondazhet sugjerojnë se do të kishin rritur epërsinë e FPÖ.

Nëse anëtarët e partisë së Neos nuk do të kishin rënë dakord të hynin në koalicion, partitë SPÖ dhe ÖVP do të kishin mbetur me një shumicë parlamentare prej vetëm një vendi – e konsideruar si shumë e ngushtë për të qeverisur efektivisht.

Dhe kjo është hera e parë që partia liberale Neos do të marrë pjesë në një qeveri federale në historinë 13-vjeçare të partisë.

Qeveria e koalicionit në pritje është vendosur të aplikojë masa më të rrepta për azilkërkuesit – duke përfshirë të paktën një pauzë të përkohshme në bashkimin familjar – ligjet e rishikuara të qiramarrjes dhe shkurtimet e planifikuara të përfitimeve. /Telegrafi/