Tre muaj kohë për përkthimin e kontratës për “Kosovën e Re”

Kontrata për Termocentralin “Kosova e Re”, do të përkthehet në gjuhën shqipe, por për shkak ët volumit të madh të saj, nevojiten tre muaj kohë.

Ministri i Zhvillimit Ekonomik (MZHE), Valdrin Lluka, pas takimit që ka pasur me kryetarin e Odës Ekonomike të Kosovës (OEK), Safet Gërxhaliu, ka thënë se vonesa e përkthimit të Kontratës për ndërtimin e Termocentralit “Kosova e Re” është për shkaqe teknike.

“Kontrata i ka 1000 faqe, përkthimi ka filluar por do të zgjasë deri në 3 muaj, përkthimin po e bën zyra jonë për menaxhimin e projektit, nuk besoj që ka një kosto të lartë”, theksoi Lluka.

Kurse kryetari i OEK-ut, Safet Gërxhaliu, ka thënë se vendit i duhet stabilitet politik.

Sipas tij, nënshkrimi i kontratës për Termocentralin “Kosova e Re”, ka rëndësi strategjike për vendin.

“Ajo që e karakterizon këtë kontratë duhet të jetë model edhe për institucionet e tjera, është transparenca. Në këtë drejtim më gëzon faktin që ministri Lluka po e bën një standard të ri që nuk ka qenë në të kaluarën për ekonomi duhet të bëhet më shumë se sa që flitet”, tha kryetari i OEK-ut Safet Gërxhaliu.

Ndryshe kontrata në mes Qeverisë së Kosovës dhe kompanisë ” Contour Global” është nënshkruar më 20 dhjetor 2017. /Telegrafi/