Tom Odell ka treguar se një nga momentet më të vështira të karrierës së tij, një koncert në Hollywood Forever Cemetery në vitin 2016, përfundoi duke u bërë frymëzim për Billie Eilish dhe vëllain e saj, Finneas.
Ai kujton se atë natë ishte i pakënaqur me performancën e tij, por pikërisht ajo shfaqje i dha Finneas motivimin për të nisur publikimin e muzikës.
Vite më vonë, Eilish dhe O’Connell nuk e harruan ndikimin e tij. Këtë verë, këngëtarja e ftoi Odell të hapte disa nga datat evropiane të turneut të saj botëror, duke rikthyer lidhjen e krijuar në atë mbrëmje të veçantë, shkruan BBC.
Për Odell, kjo ishte një dëshmi se edhe momentet që duken si dështime mund të kenë ndikim të madh te të tjerët.
Karriera e muzikantit britanik, i bërë i njohur me baladën “Another Love”, ka pasur ngritje dhe ulje. Pas viteve të vështira dhe largimit nga Sony, ai gjeti një audiencë të re në TikTok, ku kënga “Black Friday” u kthye në një fenomen global, duke u dëgjuar mbi 700 milionë herë.
Teksti i saj u përfshi edhe në serialin “Heartstopper”, duke e forcuar më tej lidhjen emocionale me publikun.
Tani, Odell ndodhet në një kapitull të ri të karrierës. Albumi i tij më i fundit, A Wonderful Life, i regjistruar në RAK Studios, shënon një rikthim të fuqishëm dhe më të lirë artistikisht.
Ai thotë se suksesi i papritur i “Black Friday” i dha mundësinë të punojë me liri të plotë kreative dhe ta përjetojë muzikën më thellë se kurrë. /Telegrafi/
