Thaçi: Marrëveshja Kosovë-Serbi arrihet sivjet

Presidenti i Kosovës, Hashim Thaçi, i cili sot pasdite do të flasë në Konferencën e Sigurisë në Mynih të Gjermanisë, ka thënë se edhe me këtë  rast do të flas për domosdoshmërinë për arritjen e marrëveshjes paqësore gjithëpërfshirëse ndërmjet Kosovës dhe Serbisë.

Presidenti Thaçi, përmes një postimi në Facebook, ka thënë se “këtë vit rajoni po përmbyll dy çështje të mëdha, atë të emrit ndërmjet Maqedonisë së Veriut dhe Greqisë si dhe marrëveshjen ndërmjet Kosovës dhe Serbisë”.

Postimi i plotë i Thaçit:

“Konferenca e Sigurisë në Munih këtë vit ka në fokus bashkëpunimin në sektorin e mbrojtjes në Evropë dhe tregtinë ndërkombëtare. Një vëmendje të veçantë ka edhe Ballkani Perëndimor dhe përpjekjet tona për të forcuar paqen në rajon. Diskutimet me liderë botërorë janë frymëzuese dhe inkurajuese. Edhe në fjalimin tim pasdite do të flas për domosdoshmërinë për arritjen e marrëveshjes paqësore gjithëpërfshirëse ndërmjet Kosovës dhe Serbisë. Këtë vit rajoni po përmbyll dy çështje të mëdha, atë të emrit ndërmjet Maqedonisë së Veriut dhe Greqisë si dhe marrëveshjen ndërmjet Kosovës dhe Serbisë. HTH”, ka shkruar ai.

Presidenti Thaçi është pjesë e delegacionit shtetëror të Kosovës i cili po merr pjesë në Konferencën e Sigurisë në Mynih.

Në margjinat e kësaj konference, Presidenti Thaçi dhe kryeministri Haradinaj po zhvillojnë takime me personalitete të larta të shtetërore të vendeve të ndryshme të botës /Telegrafi/