A do të kemi pushime sivjet? Klosi: Turizmi në Shqipëri do ta nisë më shpejt se rajoni, vera shënon rihapjen e plotë të vendit

Pandemia COVID-19 ka prekur shumë sektorë, ku një ndër ta është dhe turizmi. Operatorët turistik në Shqipëri kanë filluar të ndiejnë pasojat e COVID-19.

Operatorët turistik kanë theksuar se rezervimet e muajit prill dhe maji janë anuluar, kjo duket edhe tek shifrat e INTSTAT ku për muajin mars ka pasur një rënie me 61.8% të shtetasve që kanë hyrë në territorin e Shqipërisë.

Por edhe për vetë shqiptarët ka shumë paqartësi se si do të jenë pushimet këtë vit.

Në një lidhje me Euronews Albania, ministri i Turizmit dhe Mjedisit i Shqipërisë, Blendi Klosi u shpreh optimist se turizmi në Shqipëri do të jetë sektori i parë që do të injektojë në ekonomi, duke paralajmëruar një hapje të tij më shpejt se vendet e rajoni.

“E vetmja gjë që dihet me siguri është se pushimet këtë vit nuk do të jenë si vitet e tjera, por do të jenë gjithsesi pushime. Vera do të shënojë rihapjen e gjithë jetës sociale të vendit dhe kjo do të shoqërohet me masa më të larta sa i përket higjienës dhe distancimit social, por turizmi do të jetë injeksioni i parë që do të hyjë në ekonomi, edhe me para të ardhura nga jashtë, por edhe brenda. Virusi po kontrollohet për momentin shumë më mirë se më përpara. Kemi lajme të mira për gjetjen e kurës dhe vaksinës, ndaj duhet të fillojmë të mendojmë se fundi i muajit maj do të ketë shumë më tepër lehtësira sa i përket sektorit të turizmit”, tha ministri.