Takimi Kurti – Vuçiq, analistët vlerësojnë se nuk ka alternativë tjetër për tejkalimin e situatës

Përkundër ftesës që kanë marrë për takim në Bruksel, kryeministri i Kosovës, Albin Kurti dhe presidenti i Serbisë, Aleksandar Vuçiq ende nuk kanë konfirmuar pjesëmarrjen e tyre.

Bashkimi Evropian në një komunikatë për media ka thënë se pret nga palët që të marrin pjesë në takim pa kushte, ndërkaq një datë definitive ende nuk është dhënë.

Kryeministri i Kosovës, Albin Kurti, ka thënë se për pjesëmarrjen e tij në takimin e ftuar në Bruksel, do të vendos pasi që të marrë informacione për gjendjen e tre policëve të kidnapuar nga forcat serbe.

“Unë e kam kërkuar takimin për javën që shkoj por më është thënë që duhet të de-eskalohet gjendja e më pas kishim rrëmbimin e tre policëve tanë në Leposaviq, pra eskalimi u shtua dhe vetëm më pas unë u ftova për një takim të radhës në Bruksel që nuk jam i sigurt se është menduar saktësisht për datën 22 apo 23 qershor për shkak të mesazheve të ndryshme”, ka thënë Kurti.

Në anën tjetër, presidenti serb, Aleksandar Vuçiq ka thënë se pret që kryetarët e komunave në veri të japin dorëheqje dhe njësitë special njësitë speciale të Policisë së Kosovës të tërhiqen nga veriu i Kosovës.

Sipas tij, deri atëherë nuk dëshiron të takohet dhe të bisedojë me kryeministrin e Kosovës, Albin Kurtin në Bruksel.

“Vendimet do i marrim vetë, nuk do të konsultohemi me askënd. Nuk kemi asnjë detyrim ndaj askujt tjetër. Sa i përket dialogut, ai është krejtësisht i pakuptimtë”, ka theksuar Vuçiq.

Pavarësisht deklarimeve të tilla se nuk do të ketë takim nga ana e presidenti serb, analisti politik Arton Demhasaj ka thënë për Telegrafin se dialogu Kosovë – Serbi ka ngecë në një farë forme, megjithatë, sipas tij takimi mes Kurtit dhe Vuçiqit bëhet për tejkalimin e situatës në veri.

“Dialogu në një farë forme ka ngecë. Po flasim për një takim të mundshëm mes dy shteteve me ndërmjetësuesit e BE-së për të tejkaluar situatën momentale në veri, dhe sa i përket arrestimit të tre policëve të arrestuar, nuk po flasim më për dialog po për një takim se si të tejkalohet kjo situatë”, është shprehur ai për Telegrafin.

Demhasaj vlerëson se nuk ka asnjë alternative tjetër përveç takimeve dhe tejkalimit të kësaj situate në veri.

“Unë mendoj që më shumë gjasë edhe mund të ndodhë takimi së shpejti, mes dy liderëve sepse nuk ka alternative tjetër përpos takimeve dhe tejkalimit të kësaj situate që është momentalisht në veri. Disa herë në raste të tilla kemi pa deklarime të tilla të Vuçiqit që nuk merr pjesë në takim, mirëpo megjithatë në shumicën e rasteve ai ka marrë pjesë. Nuk po flasim për një situatë të thjeshtë po flasim për një situatë që ka eskalu shumë dhe mund të eskalojë edhe më shumë”, tha ndër tjera ai.

Analisti Demhasaj konsideron  se nuk i konvenon asnjërës palë të mos ketë takim.

“Prandaj, nuk i konvenon asnjërës palë të mos takohen, sepse nëse nuk pranojnë takim atëherë do të fajësohen për situatat që mund të ndodhin. Pra nuk mendoj që mund të ketë refuzim”, theksoi ai.

Demhasaj në deklaratën e dhënë tha se situata momentale në veri nuk i konvenon Kosovës, duke shtuar tutje se sipas tij me shumë gjasë komunat veriore do të shkojnë në zgjedhje të jashtëzakonshme.

Lexo po ashtu BE: Presim që Kurti dhe Vuçiqi të vijnë në Bruksel pa kushte

Që dialogu është e vetmja zgjidhje e konsideron edhe analisti politik Dritëro Arifi.

Ai në një prononcim për Telegrafin, tha se me dialog mund të sh’tensionohet situata në veri.

“Dialogu është e vetmja zgjidhje për çdo problem, e mos të flasim për problemin që e kemi në veri të Kosovës, ku situata është shumë e tensionuar, pra dialogu do ta sh’tensionojë situatën dhe mos të harrojmë se kemi tre policë të rrëmbyer në Serbi. Do të ishte me rëndësi që policët e Kosovës të lirohen sa më shpejtë, dhe kjo duhet të bëhet përmes dialogut, pasi Kosova nuk ka mundësi tjera për policët e rrëmbyer”, tha ai.

Arifi tha se Kosova duhet të jetë gjithmonë e gatshme për dialog.

“Se çfarë bënë Serbia neve nuk duhet të na preokupojë shumë. Veprimet tona duhet të jenë konform ligjeve por edhe bashkëpunimit me SHBA dhe BE. Për të tjerat në raport me Serbinë përgjegjëse është Bashkimi Evropian, por nga perspektiva jonë ne duhet të jemi gatshëm gjithmonë të dialogojmë për të mirën e qytetarëve”, u shpreh ai.

Ndryshe, situata në veri u tensionu pasi në komunat veriore fituan katër kandidat shqiptarë. Serbët lokalë kundërshtuan ata duke tentuar të hyjnë dhunshëm në objektet komunale.

Gjatë tensionimit të situatës serbët sulmuan ushtarë të KFOR-it, policët dhe ekipet e mediave, ku shumë prej tyre u lënduan.

Ditë më parë, forcat serbe arrestuan edhe tre policë të Kosovës, ata u dërguan në paraburgim për 30 ditë.

KFOR dhe Policia e Kosovës vazhdojnë të kenë prani të shtuar në komunat: Mitrovicë e veriut, Zubin Potok, Leposaviq dhe Zveçan./Telegrafi/